देवघाट, बैशाख २६
माता तिर्थ औंसी अर्थात् आमाको मुख हेर्ने दिनको अवसरमा बुधबार देवघाट गाउँपालिका–५ स्थित देवघाट समाज कल्याण केन्द्र वृद्धाश्रममा आश्रीत जेष्ठ नागरिकलाई भेटघाट गर्न विहानैदेखी दाताहरुको भिड लागेको थियो ।
विभिन्न ठाउँ बाट आएका संघ संस्था तथा व्यक्तिहरुले बृद्धाश्रममा आश्रीत जेष्ठ नागरिकलाई भेटी फलफूल, लत्ताकपडा भोजन तथा दान दक्षिणा उपलब्ध गराएका थिए । आमाको मुख हेर्ने औंशीको सन्दर्भ पारी बृद्धाश्रममा बिहानै देखि भीड लागेको बृद्धाश्रमले जनाएको छ ।
यस पुण्य तिथिमा आफ्ना आमाहरु गुमाउनु भएकाहरु त्था विभिन्न संघ संस्थाले आश्रममा आएर आश्रमका बुवा आमाहरुलाई भोजन तथा जिन्सी सामग्री हरु उपलब्ध गराएको आश्रमले जनाएको छ । आश्रमका वुवा आमाहरुलाई माया गरी हाम्रो आश्रमलाई सहयोग गर्ने सबैमा आश्रमले आभार व्यक्त गरेको छ ।
दाताको भरमा सन्चालित छ बृद्धाश्रम
देवघाट क्षेत्र विकास समिति मातहत सन्चालित उक्त बृद्धाश्रम दाताको भरमा नै सञ्चालन भईरहेको छ । बृद्धाश्रम सञ्चालनको लागि चालु आर्थिक वर्षमा कुनै पनि तहको सरकारले बजेट उपलब्ध नगराएको देवघाट क्षेत्र विकास समितिका कार्यकारी निर्देशक एवं बृद्धाश्रमका अध्यक्ष सदन बरालले बताए । सरकारले बजेट उपलब्ध नगराउँदा बृद्धाश्रम सञ्चालन गर्न कठिनाई भइरहेको बृद्धाश्रमका अध्यक्ष बरालले बताए ।
सरकारबाट बजेट प्राप्त नहुँदा बृद्धाश्रम सञ्चालन गर्न दाताहरूलाई गुहार्नु परेको बरालले बताए । चालु आर्थिक वर्षमा गन्डकी प्रदेश सरकारले भान्साकोठा निर्माणकोलागि भने ७ लाख रुपैयाँ उपलब्ध गराएको छ । त्यबाहेक अन्य कुनै पनि आर्थिक सहयोग र अनुदान प्राप्त नभएको बरालले बताए ।
उक्त बृद्धाश्रममा १७ पुरूष सहित ३२ जना बृद्धबृद्धा आश्रित छन् । अधिकांश दाताहरूले जन्मदिन, पितृहरूको पुण्यतिथी, वैवाहिक वार्षिकोत्सव या अन्य कुनै दिनका अवसर पारेर बृद्धबृद्धालाई खाद्यान्न र लत्ताकपडा उपलब्ध गराइरहेको बृद्धाश्रमकी व्यवस्थापक दिलमाया सापकोटाले बताइन् । उनका अनुसार चालु आर्थिक वर्षमा बृद्धाश्रमका बृद्धबृद्धालाई खाद्यान्न, लत्ताकपडा, फलफुल सबै दाताहरूले नै उपलब्ध गराइरहेका छन् ।
देवघाट क्षेत्र विकास समिति संस्कृति, पर्यटन तथा नागरिक उड्ययन मन्त्रालय मातहत रहेपनि बृद्धाश्रम भने महिला बालबालिका तथा ज्येष्ठ नागरिक मन्त्रालय मातहत सञ्चालित छ । बृद्धाश्रममा आश्रित बृद्धबृद्धाको खानपिन तथा अन्य कार्यका लागि बजेट उपलब्ध नभएपनि आश्रममा कार्यरत व्यवस्थापक, भान्से र सहयोगी सहितको कर्मचारीको लागि मासिक पारिश्रामिक भने महिला बालबालिका तथा ज्येष्ठ नागरिक मन्त्रालयबाट विनियोजन भईरहेको छ । आश्रममा १ जना व्यवस्थापक, २ जना भान्से, २ जना सुसारे र १ जना चौकीदार गरि ६ जना कर्मचारी रहेका छन् ।
कुनै दाताहरूले बृद्धाश्रममा आश्रित बृद्धबृद्धालाई खाना खुवाउन चाहेमा अग्रिम नाम दर्ता गराउनु पर्ने व्यवस्थापक सापकोटाले बताइन् । ३२ जना बृद्धबृद्धाका लागि एक छाक दाल, भात, पनिरको तरकारी साथमा दुध, दही सहितको सादा खाना खुवाउन चाहेमा ८ हजार तथा दाल भात र सादा तरकारीको खानाको लागि ४५ सय रुपियाँ तोकिएको सापकोटाले जानकारी दिइन् ।
अधिकांश दाताले समितिले तोकेको रकम उपलब्ध गराउँछन् भने केहीले आफैँले खाना र फलफुल ल्याएर उपलब्ध गराउने गरेको सापकोटाले जानकारी दिइन् । सरकारले चालु आर्थिक वर्षमा सन्चालन बजेट नदिँदा खर्च विहीन भएको समितिले यस आर्थिक वर्षको पुरै ३ सय ६५ दिनको लागि नै दाता खोज्नुपर्ने बाध्यता रहेको कार्यकारी निर्देशक बरालले बताए ।
यसको लागि विभिन्न व्यवसायी र समाजसेवीहरूलाई अनुरोध गरिएको समितिले जनाएको छ । हालसम्म देवघाट सहित चितवन भरतपुर, नवलपरासी गैँडाकोट, मुग्लिन र दमौलीका समाजसेवीहरूले बृद्धाश्रमका बृद्धबृद्धालाई खाद्यान्न उपलब्ध गराउँदै आएको सापकोटाको भनाई छ ।
