दमौली, साउन १६
मर्स्याङ्दी जलाधार क्षेत्रको एकीकृत विकास गर्न जलाधार क्षेत्रका स्थानीय सरकारहरू एकै ठाउँमा जुटेका छन् । तनहुँ सहित गोरखा, लमजुङ र मनाङका १४ स्थानीय तहका प्रमुख र प्रमुख प्रशासकीय अधिकृतहरूको बैठकले एकीकृत विकासका लागि साझा धारणा सार्वजनिक गरेका हुन् ।
लमजुङको मर्स्याङ्दी गाउँपालिका स्थित खानीगाउँमा बसेको बैठकले ५ बुँदे निर्णय गरी सम्बन्धित निकायमा दबाबको घोषणा गरेका छन् । उक्त बैठकले पालिकाले गर्न सक्ने काम यतै गर्ने र नसकेका काममा संघ र प्रदेशसँग अनुरोध गर्ने भन्ने निर्णय भएको भानु नगरपालिकाका प्रमुख आनन्दराज त्रिपाठीले बताए ।
खासगरी शिक्षा र कोरिडोर क्षेत्रमा औद्योगिक ग्राम निर्माणका लागि बैठकमा ध्यानाकर्षण भएको बन्दिपुर गाउँपालिकाका अध्यक्ष सुरेन्द्रबहादुर थापाले बताए । प्राविधिक शिक्षामार्फत गाउँको बसाइँलाई फलदायी बनाउने र उत्पादनमा आधारित कार्यक्रम लागू गर्ने हाम्रो साझा विषय भएको बैठकले ठहर गरेको थापाले बताए ।
बैठकले भदौभित्रै लमजुङको सुन्दरबजारमा शैक्षिक गोष्ठी आयोजना गर्ने, वर्षाका कारण भएको धनजनको क्षतिको तत्काल राहत उपलब्ध गराउने, भदौमा काठमाडौँमा पूर्वप्रधानमन्त्री र मन्त्री, सांसद, स्थानीय जनप्रतिनिधि, विज्ञहरूको उपस्थितिमा स्कुल अफ म्यानेजमेण्टको बैठक बस्ने निर्णय गरिएको भानु गरपालिकाका प्रमुख त्रिपाठीले जानकारी दिए ।
यसअघिको बैठकले सुन्दरबजार नगरपालिकाका मेयर कृष्ण कोइरालाको अध्यक्षतामा शिक्षा उपसमिति गठन गरेकोमा समितिले कोरिडोर क्षेत्रका विद्यालयको अवस्था र स्थायित्वका लागि आवश्यक सुझाव सहितको प्रतिवेदन पेस गरेको छ । बैठकले करिडोरका पालिकाहरूबिचको सहकार्यलाई मजवुद बनाउँदै लैजाने निर्णय गरिएको थापाले बताए ।
खासगरी फोहोरमैला व्यवस्थापन, एम्बुलेन्स र दमकल सञ्चालन, उद्योग स्थापना र सञ्चालन जस्ता क्षेत्रमा पालिकाहरूले एकीकृत रूपमा काम गर्न सकिने छलफलका सहभागीहरूले सुझाब दिएका छन् । समितिमा १४ पालिकाका प्रमुख, उपप्रमुख तथा प्रमुख प्रशासकीय अधिकृत सदस्य छन् ।
मर्स्याङ्दी जलाधार क्षेत्रको स्थानीय सरकारमा तनहुँको भानु नगरपालिका, बन्दिपुर र आँबुखैरेनी गाउँपालिका, गोरखाको पालुङटार, गोरखा नगरपालिका र शहिद लखन गाउँपालिका, लमजुङको राइनास, सुन्दरबजार र बेंशीसहर नगरपालिका तथा दोर्दी र मर्स्याङ्दी गाउँपालिका, मनाङको नासों, चामे र मनाङ ङिस्याङ गाउँपालिका रहेका छन् । समितिको अर्को बैठक कात्तिकको ९, १० र ११ गते मनाङको चामेमा बस्ने निर्णय भएको छ ।
