दमौली, जेठ १५
गणतन्त्र दिवसका अवसरमा तनहुँ कारागारबाट चार कैदीबन्दीलाई बाँकी कैद मिनाहा गरी रिहा गरिएको । जिल्ला अदालतबाट तोकिएको कैद सजायमध्ये ५० प्रतिशत कैद भुक्तान गरिसकेका कैदीबन्दीलाई राष्ट्रपतिबाट गणतन्त्र दिवस २०८० का अवसरमा कैद मिनाहा गरिएको हो ।
कारागारका निमित्त प्रमुख नारायणप्रसाद अधिकारीका अनुसार कैद मिनाहा हुनेमा बहुविवाह मुद्दाका इन्द्रजित सार्की, राजन अच्छामी, सवारी ज्यान मुद्दामा आषिश आले र कर्तव्य ज्यान मुद्दाका सुन्दर परियार रहेका छन् ।
कैद मिनाहा हुने मध्ये सवारी ज्यान मुद्दाका आलेले तीन वर्ष कैद भुक्तानी गरेसकेका छन् भने एक वर्ष चार महिना २३ दिन छुट पाएका छन् । त्यस्तै बहुविवाह मुद्धाका सार्कीले पाँच महिना २० दिन पाएका छन् । उनीहरूको बानी व्यवहार, अनुसार चालचलन, रहनसहन सबै राम्रो भएमा कारागारका जेलर र प्रमुख जिल्ला अधिकारीले गरेको सिफारिसको आधारमा कैद मिनाहा हुने व्यवस्था अनुसार उनीहरूको कैद मिनाहा गरिएको हो ।
