दमौली, भदौ ११
नेकपा माओवादी केन्द्र ऋषिङ गाउँ कमिटिले बलात्कारको आरोपी सोही गाउँपालिकाको वडा नम्बर ७ स्थित ज्यामिरेमाई प्राविका प्रअ झुलबहादुर थापालाई पक्राउ गरि कारवाही गर्न माग गरेको छ ।
नेकपा माओवादी केन्द्र ऋषिङ गाउँ कमिटिले सोमबार विज्ञप्ति प्रकाशित गरि पीडित बालिका र परिवारमाथी थप हिंसा हुन नदिन प्रशासनको ध्यानाकर्षण हुनु पर्ने बताएको छ । माओवादी केन्द्र ऋषिङ गाउँ कमिटिका सचिव डम्बर विकले हस्तारक्षर गरेको विज्ञप्तिमा दोषीलाई कुनै पनि बाहानामा उम्किन नदिन र पीडितलाई न्याय दिलाउन आ आफ्नो ठाउँबाट भुमिका निर्वाह गर्न सम्बन्धित सबैमा अनुरोध गरिएको छ ।
प्रअ थापाले गत साउन ३१ गते सोही ठाउँकी १२ बर्षिया बालिकालाई बलात्कार गरेको भन्दै पीडित परिवारले जिल्ला प्रहरी कार्यालयमा भदौ ३ गते जाहेरी दिएका छन् । प्रहरीले अहिलेसम्म आरोपितलाई पक्राउ गरेको छैन ।
आरोपित थापालाई राजनीतिक संरक्षण भएको स्थानीय बासिन्दाले गुनासो गरेका छन् । जाहेरी फिर्ता लिन पीडित परिवारलाई आर्थिक प्रलोभन समेत दिन थालिएको गुनासो पीडित परिवारले गरेका छन् ।
