तनहुँ । कार्तिक १२
जिल्ला प्रहरी कार्यालय तनहुँले आर्थिक वर्ष २०८२/०८३ को पहिलो त्रैमासिकमा १२७ थान मुद्धा दर्ता गरेको छ । यो अवधिमा दर्ता भएका ति मुद्धा मध्ये ६० फस्र्यौट र ६७ मुद्धा अनुसन्धानको क्रममा रहेको छ । जिल्ला प्रहरी कार्यालयले पहिलो तिन महिना (साउन, भदौ र असोज) मा सम्पादित कामहरुको बारेमा दिएको जानकारी अनुसार यो अवधिमा ९४ जना प्रतिबादी पक्राउ गरिएको छ । फरार अभियुक्त तर्फ २० जना पक्राउ गरिएको छ । उनीहरुबाट ९ लाख ८६ हजार ५ सय रुपैयाँ जरिवाना तथा १७ महिना १६ दिन कैद असुल गरिएको छ ।
लागु औषध तर्फ यस अवधिमा १२ वटा मुद्धा दर्ता गरिएको छ । लागु औषधका १७ आरोपित पक्राउ गरिएको छ । त्यस्तै ६ रोपनीमा लगाईएको गाँजा खेती फडानी गरिएको छ । विपद तर्फ यो तिन महिनाको अवधिमा पानीमा डुबी १ जनाको मृत्यु भएको छ भने करेन्ट लागी ४ र पानीमा डुबेर २ गरि ६ जना घाइते भएको प्रहरीले जनाएको छ । पहिरोमा परि ४ वटा पशु चौपायको मृत्यु भएको छ । त्यस्तै ३ आगलागीको घटना पनि यो अवधिमा भएको छ ।
त्यसैगरि सवारी साधन कारवाही तर्फ यो अवधिमा ५ हजार ३४ वटा सवारी साधनलाई कारवाही गर्दा ४४ लाख ५९ हजार ५ सय रुपैयाँ राजश्व संकलन भएको छ । पाँच वटा अवैध नदीजन्य कारवाही हुँदा ७४ हजार रुपैयाँ राजश्व संकलन भएको छ । यस अवधिमा १८१ वटा सवारी दुर्घटना हुँदा १२ जनाको मृत्यु भएको छ भने २७० जना घाइते भएको जिल्ला प्रहरी कार्यालय तनहुँका डिएसपी तथा सुचना अधिकारी श्रवणकुमार विकले जानकारी दिएका छन् ।
