तनहुँ । चैत २६
शुक्लागण्डकी नगरपालिकाले हलगोरु पाल्ने किसानलाई अनुदान दिने भएको छ । बिहिबार बसेको कार्यपालिका बैठकले हलगोरु पाल्ने किसानलाई अनुदान दिने निर्णय गरेको हो ।
हलगोरु पाल्ने किसानलाई ५ हजार रुपैयाँका दरले अनुदान दिने निर्णय भएको नगर कार्यपालिकाका सदस्य खिमबहादुर कुमालले बताए । यसअघि आवदेन दिएका सबै किसानले अनुदान पाउनेछन् । तर त्यसकोलागि एकपटक अध्यावधिक गर्ने निर्णय भएको छ ।
गत वर्ष चैतमा शुक्लागण्डकी नगरपालिकाले अनुदान दिने भन्दै हलगोरु पाल्ने किसानसँग आवेदन मागेको थियो । शुक्लागण्डकी नगरपालिकाले २०८१ चैत २२ गते सम्बन्धि सूचना प्रकाशित गरेको थियो । सूचनामा वार्षिक स्वीकृत कार्यक्रम अनुसार स्वरोजगार सृजना गर्ने साथै गोरुले खेत जोति खेति गर्ने परम्पराको संरक्षण गर्ने कार्यक्रम रहेको हुँदा इच्छुक कृषकवाट प्रस्ताव आह्वान गरिएको उल्लेख गरिएको थियो ।
‘प्रस्तावक कृषकले यो सूचना प्रथम पटक प्रकाशन भएको मितिले ३० दिन भित्र तपसिल अनुसारका कागजातहरु सहित तोकिएको ढाँचा अनुसारको प्रस्ताव शुक्लागण्डकी नगरपालिका पशु विकास शाखामा दर्ता गर्नु हुन यो सूचना जारी गरिएको छ । पिछडिएको क्षेत्र र विपन्न वर्गका समुदायलाई विशेष प्राथमिकता दिइनेछ’, सूचनामा उल्लेख थियो ।
त्यसपछि १२ मध्य १० वडाका ४३५ जना किसानले आवेदन दिए । १० हजार रुपैयाँको आश देखाएर नगरपालिकाले बर्ष दिनसम्म पनि दिएन । अन्नतः बिहिबारको बैठकले ५ हजार रुपैयाँ दिने निर्णय गरेको हो ।
