तनहुँ । असार २
भिमाद नगरपालिकाले अबैध नदीजन्य पदार्थ उत्खननमा संलग्न दुई ट्रिपरलाई जरिवाना गरेको छ । वडा नम्बर ५ स्थित वन्ट्याङ्ग खोलाको किनारबाट अवैध रूपमा नदीजन्य पदार्थ उत्खनन तथा ओसारपसार गर्दै गरेका दुईवटा ट्रिपरलाई मंगलबार जरिवाना गरिएको भिमाद नगरपालिकाले जनाएको छ ।
नेपाल प्रहरीको टोलीले नियमित चेकजाँचका क्रममा कानुनी कागजात बिना नदीजन्य पदार्थ (गिट्टी र बालुवा) उत्खनन गरिरहेको अवस्थामा दुई ट्रिपर नियन्त्रणमा लिएको थियो । नियन्त्रणमा लिइएका ट्रिपरहरूलाई आवश्यक कारबाहीका लागि भिमाद नगरपालिकामा पेश गरिएकोमा नगरपालिकाले प्रति सवारीसाधन रु.२० हजारका दरले जम्मा रु.४० हजार जरिवाना गरी सम्बन्धित पक्षलाई छाडिएको जनाएको छ ।
नगरपालिकाले नदीजन्य पदार्थको अवैध उत्खनन तथा ओसारपसार नियन्त्रणका लागि निरन्तर अनुगमन र कानुनी कारबाहीलाई कडाइका साथ अघि बढाइने प्रमुख प्रशासकीय अधिकृत सोभाखर पोख्रेलले जानकारी दिएका छन् ।
