देवघाट, जेठ ५
देवघाट गाउँपालिका–५ गोहीटारमा पहिलो पटक सुर्यमुखी फुलको खेती गरिएको छ । कृषि ज्ञान केन्द्र तनहुँको प्रधानमन्त्री कृषि आधुनिकीकरण परियोजनाको धान ब्लक कार्यक्रम अन्तर्गत र गोहीटार कृषि सहकारी संस्था देवघाट– ५ को साझेदारीमा बाँझो जग्गामा पहिलो पटक सुर्यमुखी फुल र मकै खेती गरिएको हो ।
प्रधानमन्त्री कृषि आधुनिकीकरण परियोजनाको धान ब्लक कार्यक्रम अन्तर्गत निर्माण भएको एउटा बोरिङबाट पानी निकालेर गोहीटारका कृषकहरुले मकै र सूर्यमुखीको खेती शुरु गरेका हुन् ।
उक्त स्थानमा कम्तीमा ३ वटा डिप बोरिङ खन्न सकियो भने त्यस क्षेत्रका सबै बाँझो जग्गामा खेती गर्न सकिने कृषि ज्ञानकेन्द्र तनहुँका प्रमुख कुलप्रसाद तिवारीले बताए । यसकोलागि सिंचाई तथा जलश्रोत डिभिजन कार्यालय, तनहुँको ध्यानाकर्षकण गरिएको तिवारीले बताए ।
वर्षायाममा आकासे पानीको भरमा उक्त क्षेत्रमा धान खेती गरेपनि हिउँदमा भने जग्गा बाँझो नै रहने गरेको हुँदा गोहीटार कृषि सहकारी संस्थासँग समन्वय गरेर पहिलो पटक सुर्यमुखी फुलको खेती गरिएको हो । साथै कृषकहरुले उक्त ठाउँको केही जग्गामा मकैको खेती समेत गरेका छन् ।
गोहीटार कृषि सहकारी संस्थाका बद्रिप्रसाद मिश्रले कृषि ज्ञानकेन्द्रको सहयोगमा डिप बोरिङ खनिएको र त्यसबाट पानी निकालेर सुर्यमुखी खेती गरिएको बताए ।
