दमौली, भदौ ७
बुद्धसिंह मार्गको बन्दिपुर गाउँपालिका–६ सरङघाट नजिकै आँपखोलामा बुधबार राती ठुलो पहिरो गएर सडक अवरुद्ध भएपछि गाउँलेहरुले नयाँ जुक्ती लगाएर ढुङ्गा फुटाएर बाटो खुलाएका छन् । पहिरोले ठुलो ढुङ्गा खसेर सडक पुर्णरुपमा बन्द भएको त्यसले मानिस र मोटरसाईलक समेत आवत जावत गर्न नसकेपछि गाउँलेहरुले दिनभर ढुङ्गा नजिकै आगो बालेर ढुङ्गा फुटाएर मोटरसाईकल आवत जावत गर्न सक्ने गरि बाटो खुलाएका छन् ।
आगोले ढुङ्गा धेरै तातेपछि फुटाउन सकिन्छ भन्ने सुनेर ढुङ्गा नजिकै आगो बालेर ढुङ्गा फुटाएर बाटो खुलाईएको स्थानिय बासिन्दा हर्कबहादुर थापाले बताए । गत साता पनि उक्त स्थानमा ठुलो पहिरो खसेर एक सातासम्म सडक अवरुद्ध भएको थियो । बन्दिपुर गाउँपालिकाले डोजर पठाएर बाटो खुलाएको तिन दिनमै पुनः ठुलो पहिरो खसेर सडक पुर्णरुपमा अबरुद्ध भएपछि बाटो खुलाउन नयाँ जुक्ती लगाईएको थापाले बताए ।
बिहिबार बिहानै सबै गाउँलेहरु भेलाभई ठुला मुढाहरु जम्मा गएर ढुङ्गा नजिकै ठुलो आगो बालेर ढुङ्गा कमजोर बनाएर फुटाएपछि अहिले मोटरसाईकल सम्म आवत जावत गर्न सक्ने भएको थापाले बताए । अव पुनः बाटो पुर्णरुपमा खुलाउन बन्दिपुर गाउँपालिकालाई नै अनुरोध गरिने थापाले बताए । गाउँपालिकाको डोजर आईपुग्न ३÷४ दिन लाग्ने भएपछि अस्थायी रुपमा बाटो खुलाईउने पहल गरेको थापाले बताए ।
