दमौली, माघ १६

स्थानीय तह संस्थागत क्षमता स्व–मुल्यांकनमा तनहुँको म्याग्दे गाँउपालिका गण्डकी प्रदेशमा नै पहिलो भएको छ । लिजामा सार्वजनिक गरिएको आर्थिक वर्ष ०७९÷८० को नतिजा अनुसार म्याग्दे गााउपालिका प्रदेशमा नै ९४.५ अंक प्राप्त गरि पहिलो वन्न सफल भएको हो ।

स्थानीय तहको कार्य प्रक्रिया र उपलब्धीहरुको बारेमा लेखाजोखा गरि सवल र दुर्बल पक्षको पहिचान गर्न, विकास तथा सुशासनमा रहेका कमी कमजोरीहरुको जानकारि लिन, आवधिक समिक्षाको आधार प्राप्त गर्न र गाउँपालिका र नगरपालिकाहरु बीचमा तुलनायोग्य सुचकहरु तर्जुमा गरि प्रतिश्र्धात्मक सुधारमा अग्रसर गराउनकोलागि स्थानीय तह संस्थागत क्षमता स्वमुल्यांकन कार्यविधि २०७७ अनुसार स्वमुल्यांकन गरि नतिजा सार्वजानिक गरिन्छ ।

सोही अनुसार म्याग्दे गाउँपालिकाको आर्थिक वर्ष ०७९÷८० को संस्थागत क्षमता स्वमुल्यांकनको नतिजा सोमबार बसेको कार्यपालिकाको बैठकले अनुमोदन गरि सार्वजानिक गरिएको गाउँपालिकाका प्रमुख प्रशासकीय अधिकृत नारायण अधिकारीले बताए ।

लिजाको नियम अनुसार विभिन्न १० वटा शिर्षकमा स्व–मुल्यांकन हुनेछ । जसमा म्याग्दे गाँउपालिकाले शासकीय प्रवन्धमा ९ अंकभारमा ९ अंक नै प्राप्त गरेको छ भने संगठन तथा प्रशासनमा ८ अंकभारमा ८ अंक, वार्षिक वजेट तथा योजना व्यवस्थापनमा ११ अंकभारमा ११ अंक, वित्तिय तथा आर्थिक व्यवस्थापनमा ११ अंकभारमा ११ अंक, सेवा प्रवाहमा १६ अंकभारमा १५ अंक, न्यायिक कार्य सम्पादनमा ७ अंकभारमा ६.५ अंक, भौतिक पुर्वाधारमा १३ अंकमा ११.५ अंक, सामाजिक समावेशीकरणमा १० अंकभारमा ९.५, वातावरण संरक्षण् तथा विपद व्यवस्थापनमा ९ अंकभारमा ८.२५ र सहकार्य र समन्वयमा ६ अंधारमा ४.७५ अंक प्राप्त गरि कुल १०० अंकभारमा ९४.५ प्राप्त गरि गण्डकी प्रदेशमा नै पहिलो बनेको हो ।

म्याग्दे गाउँपालिकाले शासकीय प्रवन्ध, संगठन तथा प्रशासन र वार्षिक वजेट तथा योजना व्यवस्थापनमा शत प्रतिशत नतिजा निकालेको छ ।

लिजामा प्रकाशित नतिजा अनुसार म्याग्दे गाँउपालिकाले समग्र स्थितीमा ९७.६२ प्रतिशत, प्रक्रियागत स्थितीमा ९५.५९ प्रतिशत र परिमाणात्मक स्थितीमा ९२.२२ प्रतिशत नतिजा प्राप्त गरेको छ ।

गण्डकी प्रदेश भरिका गाउँपालिका मध्ये स्वमुल्यांकन नतिजामा म्याग्दे गाँउपालिका प्रदेशको नै पहिलो पालिका बनेको हो । उक्त स्वमुल्यांकनमा स्याङजाको अर्जुनचौपारी गाउँपालिका दोश्रो र तनहुँको आवुखैरेनी गाँउपालिकाले तेश्रो स्थानमा रहेको छ । आवुँखैरेनीले स्वमुल्यांकनमा कुल १०० अंकभारमा ९३.२५ अंक प्राप्त गरेको थियो ।

उक्त स्वमुल्यांकनको नतिजा पछि स्थानीय तहले गर्ने मुल्यांकनको आधारमा प्रदेश र संघीय मन्त्रालयले उत्कृष्ट पालिका घोषणा गर्ने कार्यविधिमा उल्लेख छ । म्याग्दे गाउँपालिकाका अध्यक्ष श्रीप्रसाद श्रेष्ठले अहिलेको नतिजा सन्तोषजनक भएपनि अझ सतप्रतिशत नतिजा निकाल्ने गरि कार्य सम्पादन गर्नु पर्ने बताए ।