देवघाट, भदौ १३
देवघाट गाउँपालिकामा पछिल्लो समय निरन्तर खेलकुँदका कार्यक्रम आयोजना भईरहेको छ । गत महिना देवपुर टोल विकास संस्थाले सेभेन ए साइड फुटवल प्रतियोगिता आयोजना ग¥यो । अहिले देवघाट युवा जागरण सभाजको आयोजनामा हरितालिका तिजको अवसरमा तनहुँ जिल्लामै पहिलो पटक खुल्ला महिला फुटवल प्रतियोगिता सन्चालन भईरहेको छ ।
धेरैलाई लाग्दो हो, निरन्तर खेलकुँदका कार्यक्रम भईरहने देवघाटमा सुविधा सम्पन्न खेलमैदान रहेको छ । तर वास्तविकता त्यस्तो छैन, देवघाट गाउँपालिकाको केन्द्र रहेको वडा नम्बर ५ को देवघाटमा व्यवस्थित खेल मैदान छैन । अहिले महिला फुटवल प्रतियोगिता भईरहेको करिब ३ रोपनी जग्गा गाउँपालिकाले राधिका पान्डेसँग भाडामा लिएको हो ।
भाडामा लिईएको जग्गामा खेल खेलाईदै
तर उक्त जग्गा भाडामा लिएवापत गाउँपालिकाले ६ महिना यताको भाडा समेत नबुझाएपछि जग्गाधनीले उक्त जग्गामा खेती गर्ने प्रयोजनको लागि जोत्ने तयारी गरेका छन् । अहिले खेल भईरहँदा जग्गाधनीले उक्त जग्गा जोत्ने तयारी भएको हुँदा जग्गा खाली गर्न ताकेता गरिरहेको बताईएको छ ।
देवघाट गाउँपालिका–५ देवपुर स्थित देवघाट एफएम पछाडीको प्रदेश सरकारको आर्थिक सहयोगमा निर्माण गरिएको देवघाट खेलमैदान रहेको सार्वजानिक जग्गामा कालिका सामुदायिक वन उपभोक्ता समितिले तारबार लगाईदिएको छ । खेलमैदानको रुपमा प्रदेश सरकार र देवघाट गाउँपालिकाले समेत ठुलो धनराशी खर्च गरेको उक्त जग्गालाई सामुदायिक वनले आफ्नो क्षेत्र दावी गर्दै तारबार लगाएपछि खेलप्रेमीहरु निराश बनेका छन् ।
करिब १७ रोपनी क्षेत्रफलको सार्वजानिक जग्गामा खेल मैदान निर्माणको लागि २०७६ सालमा गन्डकी प्रदेश सरकार र देवघाट गाउँपालिकाको करिब १२ लाख रुपैयाँको लागतमा जग्गा सम्याउने र ग्याबिन जाली भर्ने काम भईसकेको देवघाट युवा तथा खेलकुँद समितिका तत्कालिन अध्यक्ष शुकुलाल गुरुङले बताए । तर सामुदायिक वनले तारबार लगाएपछि त्यहाँ कुनै पनि खेल खेल्न सकिँदैन ।
देवघाट खेलमैदानमा गरिएको तारबार
यसैगरि भुवनटारमा १३ रोपनीको सार्वजानिक जग्गामा खेल मैदान निर्माण गरिएको छ, तर त्यो व्यवस्थित छैन । केही वर्ष अघि कालिका माविले राष्ट्रपती रनिङ सिल्ड प्रतिश्पर्धा गराउँदा केही खेलहरु उक्त मैदानमा गराईएको थियो । त्यस यता उक्त मैदानमा अन्य प्रतियोगिताहरु सन्चालन भएको छैन ।
देवघाट गाउँपालिकाले चालु आर्थिक वर्षको नीति तथा कार्यक्रममा वडा नम्बर १ को कोटा खेलमैदान र वडा नम्बर २ को खाल्टे रङ्गशालालाई गाउँपालिकाको गौरबको योजना तोकेको छ ।
वडा नम्बर ५ मा इन्डोर खेल सन्चालनको लागि निर्माण गरिएको मधुचन्द्र कवर्डहललाई पनि गाउँपालिकाको गौरबको योजनामा समावेश गरिएपनि उक्त कवर्डहल पाँच वर्षदेखी अलपत्र अवस्थामा रहेको छ । उक्त कवर्डकल कहिले तयार हुन्छ भन्ने टुङ्गो छैन । उक्त कवर्ड हल निर्माण भईहालेपनि फुटवल र भलिवल खेल खेलाउन मिल्दैन ।
भुवनटारमा रहेको खेलमैदान
खेलकुँद प्रतियोगिताको उद्घाटनको क्रममा जनप्रतिनिधिहरुले देवघाटमा खेलकुँदलाई अगाडी बढाउनुपर्छ भन्ने भाषण गर्छन् तर व्यवहारमा भने खेलक्षेत्रमा केही काम नगर्ने स्थानीयको गुनासो छ ।
नीति तथा कार्यक्रममा गाउँपालिकाले युवा तथा खेलकुँद तर्फ विभिन्न खेलकुँद एवं खेलकुँदसँग सम्बन्धित क्रियाकलाप सन्चालन गर्ने, नीजि क्षेत्रको लगानीमा खेलमैदान र खेलकुँद भवन निर्माण गर्न प्रोत्साहित गर्ने र पालिका स्तरीय खेलकुँद कार्यक्रम सन्चालन गर्ने योजना ल्याएको छ । उक्त योजना दुई वर्ष अघिको नीति तथा कार्यक्रमकै निरन्तरता हो । त्यसको पनि कार्यान्वयनमा पालिकाको ध्यान पुगेको छैन ।
समग्र खेलकुँदको लागि वार्षिक १ लाख रुपैयाँ बजेट छुट्याएको छ तर उक्त बजेट कनिका छरे सरह हुने गरेको भन्दै वडा नम्बर ५ स्तरीय युवा तथा खेलकुँद समितिका अध्यक्ष टिका रानाले वडा नम्बर ५ मा व्यवस्थित खेलकुँद मैदान बनाउन नसक्नु निकै दुखद भएको बताए ।
