तनहुँ । फागुन २८
मन्त्रीपरिषदको बैठकले व्यास नगरपालिका वडा नम्बर ३ को भवन निर्माणकोलागि जिल्ला समन्वय समिति तनहुँको जग्गा उपयोग गर्न दिने निर्णय गरेको छ । गत सोमबार बसेको मन्त्रीपरिषदको बैठकले जिल्ला समन्वय समितिका नाममा दर्ता रहेको तनहुँ जिल्ला साविक फराकचौर गाविस वडा नं ९ ग को क्षेत्रफल ०–६–०–० (छ आना) सरकारी जग्गा व्यास नगरपालिका–३ को वडा कार्यालय भवन निर्माणका लागि उपयोग गर्न स्वीकृति दिएको हो ।
सञ्चार तथा सूचना प्रविधिमन्त्री एवं नेपाल सरकारका प्रवक्ता पृथ्वीसुब्बा गुरूङले गत फागुन २६ गते सोमबार बसेको मन्त्रिपरिषद्को निर्णय सार्वजनिक गर्दै उक्त जानकारी दिएका हुन् । वडा कार्यालय भवन नहुँदा वडा नम्बर ३ को कार्यालय व्यक्तिको घरमा भाडामा सन्चालन हुँदै आएको छ ।
सञ्चार मन्त्रालयमा बुधबार आयोजित पत्रकार सम्मेलनमा मन्त्री गुरूङले सरकारले गरेका २५ वटा निर्णय सार्वजनिक गरेका थिए ।
