विष्णु मगर । जेठ २९
नेपाल नेत्रहिन संघ काठमाडौंको आयोजनामा अपाङ्गता भएका व्यक्तिहरुको गणना गर्ने प्रयोजनले गणकहरुको लागि तिन दिने तालिम ऋषिङ गाउँपालिकामा सुरु भएको छ ।
नर्वेजियन एसोसियसन अफ द ब्लाइण्ड एण्ड पार्टिशियल्ली साईटेडसँगको सहकार्यमा तनहुँको ऋषिङ, घिरिङ र देवघाट गाउँपालिकाका सबै वडामा रहेको दशै प्रकारका सबै अपाङ्गता भएका व्यक्तिहरुको गणना गर्ने उद्देश्यले छनौट भएका गणकहरुको लागि उक्त अभिमुखीकरण तालिम आयोजना गरिएको हो ।
एक्सन फर इन्क्लुसिभ डेभलपमेन्ट परियोजना अन्तर्गत स्वास्थ्य तथा पुनस्थापना कार्यक्रमका सेवाहरु विस्तार गर्ने प्रयोजकले अपाङ्गता गणना मार्फत घरधुरी सर्भेक्षण गर्न लागिएको उक्त परियोजनाका अनित गुरोले बताए ।
उक्त तालिमको ऋषिङ गाउँपालिकाकी उपाध्यक्ष गिनु थापा मगरले उद्घाटन गरेकी थिइन् । उक्त अवसरमा बोल्दै उपाध्यक्ष मगरले स्थानीय तहसँग समन्वय गरि काम गर्दा सहज हुने मगरले बताइन् । कुनै पनि व्यक्ति रहरले अपाङ्गता नहने भन्दै उनले अपाङ्गता भएका व्यक्तिहरुको अधिकारको पनि सम्मान र संरक्षण गर्नुपर्ने बताइन् ।
सो कार्यक्रममा नेपाल नेत्रहिन संघ समाावेशी विकासको लागि कार्यका फिल्ड अफिसर प्रेम महर्जनको अध्यक्षतमा भएको थियो । सो कार्यक्रममा १८ जना गणकहरु सहभागी रहेका छन् । उक्त तालिममा फिल्ड अफिसर प्रेम महर्जन लगायतले अभिमुखीकरण तालिम दिनेछन् ।
