तनहुँ । असोज १२
घिरिङ गाउँपालिकाले गाउँपालिका भित्र रहेका ग र घ वर्गको अपाङ्गता परिचयपत्र प्राप्त गरेका अपाङ्गता भएको व्यक्तिहरुको निःशुल्क स्वास्थ्य विमा सन्चालन गर्ने भएको छ ।
घिरिङ गाउँपालिकाको स्थानिय अपाङ्गता समन्वय समितिको मिति गत भदौ १९ गते बसेको बैठकको निर्णय अनुसार आ.ब. २०८२÷०८३ को बजेटको अपाङ्गता लक्षित कार्यक्रम अन्तर्गतको विनियोजित बजेटबाट गाउँपालिका भित्र रहेका ग र घ वर्गको अपाङ्गता परिचयपत्र प्राप्त गरेका अपाङ्गता भएको व्यक्तिहरुको निःशुल्क स्वास्थ्य विमा सन्चालन गर्ने निर्णय गरिएको थियो ।
गाउँपालिकाले स्वास्थ्य विमाका अभिकर्ताहरुलाई ग र घ वर्गको अपाङ्गता परिचयपत्र प्राप्त गरेका अपाङ्गता भएको व्यक्तिहरुको स्वास्थ्य विमा गर्दा कुनै शुल्क नलिन निर्देशन दिएको छ । गाउँपालिकाका अनुसार घिरिङ गाउँपालिकाभरी ग वर्गका ५९ जना र घ वर्गका १७ जना अपाङ्गता परिचयपत्र प्राप्त गरेका नागरिकहरु रहेका छन् ।
स्वास्थ्य विमा कार्यालय तनहुँमा पालिकाबाट रकम भुत्तानी गर्ने क्रममा सम्बन्धित अपाङ्गता परिचयपत्र नागरिकता वा जन्मदर्ताको प्रमाणपत्र आदि कागजातहरुको फोटोकपि असोज मसान्त भित्र पालिकामा उपलब्ध गराउन पनि गाउँपालिकाले अनुरोध गरेको छ ।
