देवघाट अनलाइन
दमौली, चैत २०
तनहुँको क्षेत्र नम्बर १ मा आगामी बैशाख १० गते हुने उपनिर्वाचनको लागि नौ राजनीतिक दलद्वारा उम्मेदबारी दर्ता गरेका छन् । निर्वाचन कार्यतालिका अनुसार चैत २० गते उम्मेदबारको मनोनयन दर्ता गर्ने कार्यक्रम रहेको थियो । नौ राजनीतिक दलका उम्मेदबारहरुले बिहान १० देखी साँझ ५ बजे भित्र मनोनयन दर्ता गराउनु भएको तनहुुँका मुख्य निर्वाचन अधिकृत कोमलप्रसाद आचार्यले जानकारी दिए ।
मुख्य निर्वाचन अधिकृतको कार्यालयका अनुसार नेपाल मजदुर किसान पार्टीबाट रामप्रसाद प्रजापती, राष्ट्रिय जनमुक्ति पार्टीबाट पुर्णबहादुर राना, मंगोल नेशनल अर्गनाइजेसनबाट प्रेमबहादुर थापा, नागरिक उन्मुक्ति पार्टीबाट भिमबहादुर सुनार, नेपाल कम्युनिष्ट पार्टी (समाजबादी) बाट गणेश श्रेष्ठ, राष्ट्रिय प्रजातन्त्र पार्टीबाट सोभा गुरुङ, राष्ट्रिय स्वतन्त्र पार्टीबाट स्वर्णिम वाग्ले, नेकपा एमालेबाट सर्वेन्द्र खनाल र नेपाली काँग्रेसबाट गोविन्द भट्टराईले उम्मेदबारी दर्ता गरेका थिए ।
उम्मेदबारी दर्ताको लागि मुख्य निर्वाचन अधिकृतको कार्यालयले दलहरुको लागि छुट्टाछुट्टै समय निर्धारण गरेको थियो । निर्वाचन आयोगले उपनिर्वाचनका लागि उम्मेदवारको मनोनयनपत्र पेश गर्न जाँदा उम्मेदवार, प्रस्तावक र समर्थक सहित बढीमा पच्चीस जना भन्दा बढीको जुलुस लिएर जान नपाइने निर्देशन दिएपनि नेपाली काँग्रेस, नेकपा एमाले र राष्ट्रिय स्वतन्त्र पार्टीले नारा लगाउँदै सहित सयौंको संख्यामा सहभागिको जुलुस प्रद्रर्शन गरेका थिए ।
गत मंसिर ४ मा भएको निर्वाचनमा निर्वाचित नेपाली कांग्रेसका रामचन्द्र पौडेल राष्ट्रपति बनेपछि बैशाख १० मा उपनिर्वाचन हुन लागेको हो ।
