दमौली, बैशाख २५
बन्दीपुरको सौन्दर्य बचाई राख्न वडा नम्बर ४ को फेदीको चौतारा देखी बन्दीपुर बजारसम्म जाने बाटोमा ढुङ्गा छाप्ने काम सुरु भएको छ । पर्यटन, उद्योग बाणिज्य तथा उपभोक्ता हित संरक्षण निर्देशानालयको आर्थिक सहयोगमा बन्दिपुरको उक्त बाटोमा ढुङ्गा ओच्छाउने काम सुरु गरिएको हो ।
उक्त कार्यकोलागि करिव ८० लाख बजेट विनियोजन गरिएकोमा उक्त रकममा १० प्रतिशत उपभोक्ता समितिको लगानी रहनेछ ।
पर्यटकको आगमन हुने स्थानमा मौलिक स्वरुपमै बाटो निर्माण गर्न लागिएको गाउँपालिका अध्यक्ष सुरेन्द्रबहादुर थापाले बताए । पूर्वाधारमा सकेसम्म मौलिकता कायम गर्ने काम भइरहेको भन्दै अध्यक्ष थापाले मौलिकता कायम राख्न सकेमा पर्यटक पनि आकर्षित हुने बताए ।
बन्दिपुरको अर्काे पर्यटकीय क्षेत्र वडा नम्बर ३ को रामकोटमा यसैबर्ष र बन्दीपुरको वडा नम्बर ५ र ६ का पर्यटकीय क्षेत्र धरमपानी, कल्लेरी, माझथर, कोरिसालगायत स्थानमा आगामी आर्थिक वर्षमा ढुङ्गा बिछ्याउने योजना रहेको गाउँपालिकाले जनाएको छ ।
