देवघाट, साउन २९
गण्डकी प्रदेशको गौरबको आयोजनाको रुपमा रहेको सालिग्राम करिडरमा कालोपत्रे गर्नकोलागि तिन वटा ठेक्का सम्झौता गरिएको छ । उक्त सडक खण्डमा कालोपत्रे गर्नका लागि तीन वटा ठेक्का सम्झौता गरिएको पूर्वाधार विकास कार्यालय तनहुँले जनाएको छ ।
सालिग्राम कोरिडरको दासढुङ्गादेखि देउपुरसम्मको ६ दशमलब २ किलोमिटर दूरीमा यसअघि नै कालोपत्र कार्य सम्पन्न भैसकेको छ । तेह्र करोडको लागतमा उक्त सडक कालोपत्रे गरिएको थियो ।
तनहुँ खण्डमा पर्ने कूल ८२ किलोमिटर सडकमध्ये अव देवघाट गाउँपालिका–५ को देउपुरबाट वडा नम्बर १ को भतेरीसम्मको करिब सत्र किलोमिटर दूरीमा कालोपत्रे गर्नका लागि नयाँ ठेक्का सम्झौता भएर प्रक्रिया अघि बढिसकेको कार्यालयले जनाएको छ । उक्त खण्ड सडक चालु आबमा सुरु गरी दुई बर्षभित्र कालोपत्र सम्पन्न गर्ने लक्ष्य रहेको छ ।
त्यसैगरी घिरिङ गाउँपालिकाको बैडीबाट पुट्टारसम्मको ३२ किलोमिटर दूरीमा ग्रावेल सडक निर्माणका लागि दुई वटा ठेक्का भई सम्झौता भएको छ । घिरिङ्गको करुवाटारसम्मको २१ दशमलब ५६५ किलोमिटर दूरीसम्म पहिलो ठेक्का सम्झौता भएको छ । उक्त दूरीमा ग्रावेल सडक निर्माण गरिने छ । सडक निर्माणको चार करोड बजेट बिनियोजन गरेको छ ।
त्यसैगरी घिरिङ्ग गाउँपालिकाको करुवाटारदेखि दश दशमलब ४३५ किलोमिटर दूरी दोस्रो ठेक्का सम्झौता भएको छ । उक्त दूरीमा पनि ग्रावेल सडक निर्माण गरिनेछ । सो कार्यकोलागि चार करोड बजेट बिनियोजन गरिएको छ । शालिग्राम करिडोर देवघाटको दासढुङ्गाको पुलबाट देउपुर, कोटा, रुपटार, मानपुर, डेढगाउँ, बैदी हुदै पाल्पाको रामपुर र स्याङ्जा जिल्ला जोड्छ । कालिगन्डकी करिडोरबाट पाल्पा र स्याङ्जालाई तनहुँसँग जोडेपछि त्यसपछि शालिग्राम करिडोर सुरु हुन्छ ।
