दमौली, साउन ३१
शुक्लागन्डकी नपा–६ स्थित खैरेनी माविकी छात्रा अन्जना राई कक्षा १२ को नतिजामा छात्राहरु तर्फ गन्डकी प्रदेशमै सर्वाेत्कृष्ट भएको विद्यालयले दावी गरेको छ । विद्यालयका प्रअ बोधराज ढकालले सामुदायिक विद्यालयबाट छात्रातर्फ अन्जनाले गण्डकी प्रदेशमै उत्कृष्ट अंक ल्याउन सफल भएको दाबी गरे । ‘हालसम्म हाम्रै विद्यालयको सामुदायिकतर्फ छात्राको नतिजा अगाडी छ,’ उनले भने, ‘विद्यालय, शिक्षक, व्यवस्थापन समिति, अभिभावको मिहिनेतले हामीलाई हौसला प्रदान गरेको छ ।’
मंगलबार सार्वजानिक भएको कक्षा १२ को नतिजामा राईले ३.८७ जिपिए प्राप्त गरेकी थिईन् । छात्रा तर्फ उक्त नतिजा गन्डकी प्रदेशमै सबैभन्दा बढि भएको विद्यालयका प्रअ ढकालले बताए । त्यसैगरि सोही विद्यालयकी अर्की छात्रा समिक्षा न्यौपानेले ३.७५ जिपिए ल्याउन सफल भएकी छिन् । खैरेनी माविले बुधबार एक कार्यक्रमको आयोजना गरि छात्राद्वय राई र न्यौपानेलाई सम्मान गरेको छ । उनीहरु व्यवस्थापन समुहका विद्यार्थी हुन् ।
सम्मान कार्यक्रममा विद्यालय व्यवस्थापन समितिका अध्यक्ष कमलमोहन घिमिरे, प्रधानाध्यापक बोधराज ढकाल, शिक्षक अभिभावक संघका अध्यक्ष शेषकान्त पौडेल लगायतले उनीहरुको आगामी शैक्षिक यात्राको सफलताको कामना गरे ।
वि.स. २०२६ सालमा स्थापना भएको सो विद्यालयमा कक्षा १२ सम्म १ हजार २ सय बढि विद्यार्थी अध्ययनरत छन् ।
