अन्जान परियार । घिरिङ, भदौ १८
मानपुर–डेडगाउँ सडक खण्ड अन्तर्गत घिरिङ गाउँपालिका–४ पुर्कोट बरभन्ज्याङ्गमा मंगलबार दिउँसो जिप दुर्घटना हुँदा तीन जना घाइते भएका छन् ।
१२ जना यात्रु बोकेर भिमादबाट नवलपुरको बुलिङ्गटार तर्फ जाँदै गरेको ग १ ज ७४१० नम्बरको जिप ब्रेकफेल भई ढिस्कोमा ठोक्किई दुर्घटना भएको उक्त जिपका सह–चालकले बताए । घाइते हुनेहरुमा ऋषिङ्ग गाउँपालिका–५ घर भएका जिप चालक २९ बर्षिय सोम कुमार श्रेष्ठ, बुलिङ्गटार गाउँपालिका–३ स्वामिडाँडा नवलपुरकी ४० बर्षिया तिला बिक र उनकी १९ छोरी १९ बर्षिया अस्मिता विक रहेकी छिन् ।
चालक श्रेष्ठ र तिलाको हात भाँचिएको छ भने अस्मिताको टाउकोमा चोट लागेको पोखरीछाप प्रहरी चौकीका प्रमुख प्रहरी सहायक निरिक्षक उमेश कुमार यादबले जानकारी दिए ।
घाइतेहरुलाई उपचारको लागि मेट्रोसिटी अस्पताल पोखरा पठाईएको यादवले जानकारी दिए । घाइतेहरुलाई वडा अध्यक्ष भिम बहादुर कुमाल, प्रहरीको टोली र स्थानीयहरुले उद्धार गरेका थिए ।
