दमौली, माघ २०
शुक्लागन्डकी नपा–७ मालेबगरमा आइतबार टिप्परको ठक्करबाट स्कुटीमा सवार एक जनाको मृत्यु भएको छ । खैरेनीटारबाट दमौली जाँदै गरेको ग १ क ५८९६ नम्बरको टिप्परले प्रदेश ०१.०२२ च ६७७८ नम्बरको कार र ग १८ प ७७५२ नम्बरको स्कुटरलाई एकसाथ ठक्कर दिँदा स्कुटरमा सवार पोखरा ३२ की ४१ बर्षीया अप्सरा क्षेत्रीको मृत्यु भएको इलाका प्रहरी कार्यालय बेलचौताराले जानकारी दिएको छ ।
ठक्करबाट घाइते भएकी अप्सरालाई उपचारकोलागि जिपि कोईराला अस्पतालमा लगिएकोमा चिकित्सकले मृत घोषणा गरेका थिए ।
उक्त दुर्घटनामा स्कुटर चालक अप्सराका छोरा दिपेश कुमार क्षेत्री र कार चालक शुक्लागण्डकी नपा–११ साँखे बस्ने ३१ वर्षिय महेश पौडेल घाइते भएको इलाका प्रहरी कार्यालय बेलचौताराका इन्चार्ज प्रहरी निरिक्षक पोषण थापाले जानकारी दिए ।
ठक्कर दिने टिप्पर चालक जिल्ला धादिङ निलकण्ठ नपा–२ का ४० बर्षिय प्रकाश गुरूङ प्रहरीको नियन्त्रणमा रहेको र उक्त घटना सम्बन्धमा थप अनुसन्धान भईरहेको जिल्ला प्रहरी कार्यालयले जनाएको छ ।
