तनहुँ । चैत २८
पृथ्वीराजमार्ग अन्तर्गत तनहुँको शुक्लागण्डकी–२ स्थित दुलेगौंडा–कोत्रे खण्डको गाछेपानीमा शनिवार भएको सवारी दुर्घटनामा दुई जनाको मृत्यु भएको छ । पोखराबाट काठमाडौतर्फ आउदै गरेको बा ग च ७३६५ नम्बरको पिकअप भ्यानले विपरित दिसातर्फ जादै गरेको ग १९ प २९८८ नम्बरको स्कुटरलाई ठक्कर दिँदा स्कुटरमा सवार दुई जनाको मृत्यु भएको हो ।
पिकअप भेन चालकले नियन्त्रण गुमाई सडक बिचको डिभाईडर क्रस गरी बिपरित दिशाबाट जाँदै गरेकाको स्कुटरलाई ठक्कर दिएको थियो ।
मृत्यु हुनेमा स्कुटर चालक पाँचथर घर भई हाल गाछेपानीस्थित श्री मुक्तिनाथ शुक्लागण्डकी च्यवनधाममा पुजारीको रुपमा कार्यरत ३० वर्षिय गणेश खतिवडा र गाछेपानी निवासी स्कुटरको पछाडी सवार ५५ वर्षिय कृष्ण बहादुर भुजेल रहेका छन् । खतिवडा विगत ४ वर्षदेखि च्यवनधाममा पुजारीको रुपमा कार्यरत थिए । खतिवडाको तनहुँ सेवा हस्पिटलमा उपचारको क्रममा मृत्यु भएको इलाका प्रहरी कार्यालय बेलचौताराका प्रमुख प्रहरी निरिक्षक धननारायण श्रेष्ठले जानकारी दिए । भुजेलको पोखरामा उपचारको क्रममा मृत्यु भएको हो ।
उनका अनुसार गाडी र गाडी चालक ललितपुरका ६३ वर्षिय कृष्ण बहादुर श्रेष्ठ प्रहरीको नियन्त्रणमा छन् । सीसीटीभी फुटेजमा देखिए अनुसार विपरित लेनमा आएर स्कुटरलाई ठक्कर दिएको हो । यसबारे थप अनुसन्धान भइरहेको प्रहरीले जनाएको छ ।
