देवघाट । बैशाख २४
देवघाट स्थित त्रिशुली र कालीगण्डकीको संगम वेणीमा बनाईएका टहराहरु सात दिनभित्र हटाउनुपर्ने भएको छ । देवघाट क्षेत्र विकास समितिले देवघाटधामको वेणी संगममा विभिन्न संघसंस्था, जोगी, भिक्षु पण्डित तथा व्यवसायीहरूले विभिन्न प्रयोजनको लागि बनाएको टहराहरू सात दिनभित्र अर्थात् वैशाख ३० गतेभित्र हटाउन निर्देशन दिएको छ ।
देवघाट गाउँपालिका वडा नम्बर ५ कार्यालयले बुधबार सुचना प्रकाशन गरि देवघाटको वेणी संगममा बनाइएका अस्थायी टहरा हटाउनकोलागि देवघाट क्षेत्र विकास समितिलाई अनुरोध गरेको थियो । वडाका विभिन्न राजनीतिक दलहरुले समेत वेणी संगममा बनाईएका टहरा हटाउनको लागि पहल गर्न वडा कार्यालयलाई अनुरोध गरेको थियो ।
वेणी संगमको स्नानघाट संरक्षणकोलागि बनाईएका पर्खाल भन्दा तल विभिन्न संघसंस्था, जोगी, भिक्षु पण्डित तथा व्यवसायीहरूले विभिन्न प्रयोजनको लागि बनाएको टहराहरू सात दिनभित्र हटाउनुपर्ने देवघाट क्षेत्र विकास समितिका सदस्य रामहरि पुडासैनीले बताए ।
