तनहुँ । जेठ ४
राष्ट्रिय स्वतन्त्र पार्टी (रास्वपा) धमाधम वडा अधिवेशनमा केन्द्रित भएको छ । केन्द्रीय महाधिवेशनको मिति तय भएसँगै पार्टीले वडा, पालिका र जिल्ला अधिवेशनको पनि मिति तोकेपछि रास्वपाले धमाधम वडा अधिवेशन गर्न थालेको हो ।
हालसम्म एक पटक पनि वडा अधिवेशन नभएको वडाहरुमा अहिले वडा अधिवेशन चलिरहेको रास्वपा तनहुँका सभापती विश्व बास्तोलाले बताए ।
वैशाख २० गते अघि वडा समिति गठन भइनसकेका वडाको अधिवेशनको मिति जेठ ३ गतेका लागि तोकिएको थियो । जेठ ३ गतेसम्म वडा समिति नबनेका वडाहरुमा जेठ १० गतेसम्म वडा अधिवेशन गरिसक्ने रास्वपाको कार्यतालिका रहेको बास्तोलाले बताए ।
बास्तोलाका अनुसार हालसम्म क्षेत्र नम्बर १ को देवघाटको वडा नम्बर ४ र भानुको वडा नम्बर ६ बाहेकको सम्पुर्ण वडामा अधिवेशन सकिएको भने क्षेत्र नम्बर २ को पालिकाहरुमा जेठ १० गतेसम्म अधिवेशन सकिने छ । ऋषिङ र घिरिङ गाउँपालिकामा भने वडा अधिवेशनको सट्टामा पहिलो चरणमा वडा भेला गर्ने रास्वपाको योजना रहेको छ ।
जेठ १० गतेसम्म वडा अधिवेशन र भेला गरिसकेपछि रास्वपाले पालिका अधिवेशन जेठ १७ को लागि तोकिएको बास्तोलाले बताए । रास्वपाको पहिलो महाधिवेशन आगामी असार ७, ८ र ९ गते चितवनमा हुने भएको छ ।
