तनहुँ । साउन ५
तनहुँको घिरिङ गाउँपालिकाले घातक एवं कडा रोग लागेका स्थायी बासिन्दाहरूलाई प्रदान गर्दै आएको मासिक ५ हजार रुपैयाँ औषधि उपचार खर्च निरन्तरताका लागि कागजात पेस गर्न आग्रह गरेको छ ।
गाउँपालिकाले एक सूचना जारी गर्दै मृगौला प्रत्यारोपण गरेका, डायलाइसिस गराइरहेका, क्यान्सर रोगी र मेरुदण्ड पक्षघात भएका बिरामीहरूलाई चालू आर्थिक वर्ष २०८३/०८४ मा सो सुविधाको निरन्तरता तथा नयाँ बिरामी दर्ताका लागि आवश्यक कागजात पेस गर्न अनुरोध गरेको हो ।
नेपाल सरकारको ‘मृगौला प्रत्यारोपण गरेका, डायलाइसिस गराइरहेका, क्यान्सर रोगी र मेरुदण्ड पक्षघातका बिरामीलाई औषधि उपचार बापत खर्च उपलब्ध गराउने सम्बन्धी कार्यविधि, २०७८’ बमोजिम गाउँपालिकाले मासिक रु. ५ हजारका दरले यो रकम उपलब्ध गराउँदै आएको छ ।
उपचार खर्च निरन्तरता तथा नयाँ दर्ताका लागि आवश्यक कागजातहरू सहित निबेदन दिन गाउँपालिकाले अनुरोध गरेको छ । बिरामी उपचाररत अस्पतालको चिकित्सकको सिफारिस, बिरामीको नागरिकता वा जन्मदर्ताको प्रतिलिपि, सम्बन्धित बिरामीको बैंक खाताको चेकको प्रतिलिपि, सम्बन्धित वडा कार्यालयको नवीकरण सिफारिस पत्र तथा मेरुदण्ड पक्षघात रोगको हकमा बिरामीको अपाङ्गता परिचयपत्र वर्गीकरण प्रतिलिपि सहित निबेदन दिन गाउँपालिकका अनुरोध गरेको छ ।
गाउँपालिकाका प्रमुख प्रशासकीय अधिकृत कृष्ण प्रसाद ढकालका अनुसार गाउँपालिकामा पहिलेदेखि दर्ता रहेका पुराना बिरामी र नयाँ थपिएका बिरामीहरूले तोकिएका कागजातहरू पेस गरी यो सुविधा लिन सक्नेछन् ।
