तनहुँ । साउन ५
तनहुँको भिमाद नगरपालिका–६ स्थित भिमाद प्राथमिक स्वास्थ्य केन्द्रमा अबदेखि साप्तहिक रूपमा विशेषज्ञ चिकित्सकहरूबाट सेवा प्रदान गरिने भएको छ । नगरवासीलाई घरआँगनमै सहज र गुणस्तरीय स्वास्थ्य सेवा उपलब्ध गराउने उद्देश्यले यो सेवा सुरु गर्न लागिएको हो ।
भिमाद नगरपालिका, नगर कार्यपालिकाको कार्यालय तथा भिमाद प्राथमिक स्वास्थ्य केन्द्र र शुक्लागण्डकीस्थित जि.पि.कोइराला राष्ट्रिय श्वासप्रश्वास उपचार केन्द्रबीच गत २०८३ असार ३१ गते भएको द्विपक्षीय सम्झौता अनुसार यो कार्यक्रम अघि बढाइएको हो ।
वार्षिक स्वीकृत कार्यक्रम अन्तर्गत प्राथमिक स्वास्थ्य केन्द्रमा प्रत्येक हप्ता विशेषज्ञ डाक्टरहरूले बिरामीको परीक्षण तथा उपचार गर्नेछन् । सोही निर्णय अनुसार साउन ६ गते बुधबार ‘इन्टर्नल मेडिसिन’का विशेषज्ञ चिकित्सकले भिमाद पुगेर बिरामीहरूलाई प्रत्यक्ष सेवा प्रदान गर्ने नगरपालिकाले जनाएको छ ।
नगरपालिकाले मंगलबार एक सूचना जारी गर्दै सम्बन्धित सम्पूर्ण बिरामी तथा सर्वसाधारणलाई स्वास्थ्य केन्द्रमा उपस्थित भई यो विशेषज्ञ सेवाको लाभ लिन र अवसरको सदुपयोग गर्न आग्रह गरेको छ ।
विशेषज्ञ चिकित्सकको सेवा विस्तार भएसँगै सामान्य उपचारका लागि पनि टाढाका अस्पताल धाउनुपर्ने स्थानीयको बाध्यता हट्ने र स्वास्थ्य क्षेत्रमा ठूलो राहत पुग्ने विश्वास लिइएको छ ।
