तनहुँ । भदौ २२
नेपाल घरेलु तथा साना उद्योग महासंघ महिला उद्यमी समिति तनहुँद्वारा सञ्चालित ‘व्यास कोसेली घर’ ले भोटेकोशी–त्रिशूली बाढीपीडितको राहत तथा उद्धारका लागि ४० हजार रुपैयाँ सहयोग गरेको छ ।
कोसेली घरले सोमबार उक्त रकम प्रधानमन्त्री दैवी प्रकोप उद्धार कोषमा जम्मा गरेको सञ्चालक समिति सदस्य तुलसी सापकोटाले जानकारी दिए ।
गत भदौ १४ गतेदेखि दमौलीको अनशनचौतारीमा सञ्चालनमा आएको कोसेली घरको शुभारम्भका अवसरमा अध्यक्ष कल्पना गौलीले सुरुवाती तीन दिनको व्यापारबाट प्राप्त रकमको १० प्रतिशत उद्धार कोषमा जम्मा गर्ने प्रतिबद्धता जनाउनुभएको थिए । सोही प्रतिबद्धता अनुसारको रकममा १५ जना उद्यमी महिलाहरूबाट संकलित स्वेच्छिक सहयोग रकम थप गरी कोषमा पठाइएको सापकोटाले बताए ।
व्यास कोसेली घरमा तनहुँका स्थानीय उद्यमी महिलाहरूले उत्पादन गरेका वस्तुका साथै विभिन्न स्थानमा उत्पादित विषादीरहित खाद्यान्न, रैथाने उपज र हस्तकलालगायतका स्वदेशी सामग्रीहरू बिक्रीका लागि राखिएका छन् ।
