तनहुँ । भदौ ३०
भिमाद नगरपालिकाको कार्यालयबाट विभिन्न स्थानीय तहका नागरिकहरूलाई लक्षित गरी राष्ट्रिय परिचयपत्र सम्बन्धी सेवा सञ्चालनमा आएको छ । भिमाद नगरपालिकाले मंगलबार सूचना जारी गर्दै बायोमेट्रिक विवरण संकलन तथा फोटो खिच्ने कार्य नगरपालिकाको कार्यालयबाटै सुरु भएको जनाएको छ ।
भिमादबाट भिमाद नगरपालिका, घिरिङ गाउँपालिका, ऋषिङ गाउँपालिकाको वडा नं. ५, ६, ७ र ८ तथा म्याग्दे गाउँपालिका वडा नं. ५ का नागरिकलाई सेवा प्रदान गरिने भएको छ ।
भिमाद नगरपालिकाका प्रमुख प्रशासकीय अधिकृत शोभाखर पोखरेलद्वारा हस्ताक्षरित सूचना अनुसार उल्लिखित क्षेत्रका सर्वसाधारण नागरिकहरूले राष्ट्रिय परिचयपत्रका लागि बायोमेट्रिक दिन र फोटो खिचाउन भिमाद नगरपालिकाको कार्यालयमा सम्पर्क गर्न सक्नेछन् ।
भिमादमा राष्ट्रिय परिचयपत्र विवरण दर्ता स्टेशन सञ्चालनका लागि आवश्यक सामग्री जडानको काम सोमबारदेखि सुरु भएको थियो । जिल्ला प्रशासन कार्यालय तनहुँले भिमाद बजारमा दुई वटा विवरण दर्ता स्टेशन स्थापना गरेको थियो ।
प्रमुख जिल्ला अधिकारी शिवलाल तिवारीले भिमादको स्टेशनबाट भिमाद नगरपालिका, घिरिङ गाउँपालिका, ऋषिङ गाउँपालिका, शुक्लागण्डकी नगरपालिका, म्याग्दे गाउँपालिका नागरिकले स्थानीयस्तरबाटै राष्ट्रिय परिचयपत्रसम्बन्धी सेवा पाउने बताए । यसबाट पश्चिमी तथा दक्षिणी क्षेत्रका नागरिकलाई राष्ट्रिय परिचयपत्र बनाउन दमौली आउनुपर्ने बाध्यता कम हुनेछ ।
जिल्ला प्रशासन कार्यालयमा राष्ट्रिय परिचयपत्र बनाउन सेवाग्राहीको चाप बढेपछि सेवा विस्तार गर्न भिमादमा स्टेशन राखिएको हो । प्रशासन कार्यालयले सेवाग्राहीको चापअनुसार जनशक्ति र उपकरण थप गर्नसमेत माथिल्लो निकायमा पत्राचार गरेको छ । भिमादमा दुई वटा स्टेशन सञ्चालनमा आएपछि दमौलीमा रहेको चापसमेत घट्ने अपेक्षा गरिएको छ ।
यसैगरी भानु नगरपालिका, बन्दीपुर गाउँपालिका, आँबुखैरेनी गाउँपालिका र देवघाट गाउँपालिकाका नागरिकलाई लक्षित गरी डुम्रे आसपासमा अर्को विवरण दर्ता स्टेशन स्थापना गर्ने तयारीसमेत भइरहेको छ । प्रजिअ तिवारीका अनुसार उक्त स्टेशनका लागि कार्यालय व्यवस्थापनको लागि स्थान खोजी भइरहेको छ ।
