१२ भदौ, देवघाट
तनहूँको देवघाटमा गाउँपालिकाले बिहान चार र साँझ तीन घण्टा पसल खोल्न दिने निर्णय गरेको छ । गाउँपालिकाले दैनिक जीवनमा अत्यावश्यक पर्ने खाद्यान्नका पसलहरु बिहान ६ बजेदेखि १० बजेसम्म र साँझ ३ बजेदेखि ६ बजेसम्म खोल्न दिने निर्णय गरेको हो । जिल्ला प्रशासन कार्यालयले लगाएको निषेधाज्ञाको अवधि शुक्रबार रातीबाट सकिएपछि देवघाट गाउँपालिकाले विहान र बेलुकी पसल खोल्न दिने निर्णय गरेको हो ।
वडा नम्बर ५ को समुदाय स्तरमा कोरोना देखीको र सर्वसाधरणमा थप जोखिम बढ्न सक्ने विद्यमान परिस्थिती र जिल्लाका अन्य स्थानमा समेत संक्रमितको पहिचान भएको हुँदा यस अवस्थामा अत्यावश्यक बाहेक अन्य काममा सर्वसाधरण घरबाहिर ननिस्कन तथा आफु, परिवार र समुदायलाई नै सुरिक्षत गराउन गाउँपालिकाले सबैमा अपिल गरेको छ ।
गाउँपालिका बाहिर अत्यावश्यक खाद्यान्न सामग्री लिन जानुपर्ने भएमा बिहान ५ बजेदेखि ८ बजेसम्म र बेलुका ५ बजेदेखि ७ बजेसम्मलाई समय निर्धारण गरिएको प्रमुख प्रशासकीय अधिकृत रमेश सुवेदीले जानकारी दिए । गाउँपालिकाले आन्तरिक रुपमा गर्नुपने निर्माण सम्बन्धी कामलाई पनि खुल्ला गरेको छ ।
तर त्यसका लागि वडा कार्यालय र इलाका प्रहरी कार्यालयसँग समन्वय गर्नुपर्ने सुवेदीले बताए । निर्माण सम्बन्धी काम गर्दा मास्क, स्यानीटाइजर, साबुपानी प्रयोग गरी सामाजिक दूरी कायम गर्ने र धेरै जना संलग्न भई गर्नुपर्ने निर्माण कार्यमा संलग्न जनशक्ति एक ठाउँमा बस्नुपर्ने सुवेदीले बताए ।
गाउँपालिकाले कोरोनाको जोखिम बढ्न सक्ने परिस्थितिलाई ध्यानमा राखेर अनावश्यक रुपमा हिँडडुल नगर्न समेत आग्रह गरेको छ । घर बाहिर निस्कदा मास्कको प्रयोग नगरेमा ५० देखी एक सय रुपैयाँ सम्म जरिवाना गरिने गाउँपालिकाले जनाएको छ ।
