देवघाट अनलाइन
दमौली, चैत २७
नेपाली कांग्रेस केन्द्रिय सदस्य शंकर भण्डारीले बैशाख १० गते हुने उपनिर्वाचनमा नेपाली काँग्रेसका उम्मेदबार गोविन्द भट्टराईलाई जिताएर मन्त्री बनाउनु पर्ने बताएका छन् । तनहुँ क्षेत्र नम्बर १ का मतदाताले तत्कालिन नेपाली कांग्रेसका वरिष्ठ नेता रामचन्द्र पौडेललाई जिताएर राष्ट्रपति बनाएको र वैशाख १० गते हुने उपनिर्वाचनमा भट्टराईलाई जिताएर मन्त्री बनाउने अवसर आएको बताए । वर्तमान सरकारमा मन्त्री बन्ने निकै प्रयास गरे पनि त्यो अवसर नपाएका भण्डारीले उपचुनाव जितेर गएमा भट्टराईलाई मन्त्री बनाइने बताएका हुन् ।
भण्डारीले तनहुँको व्यास नगरपालिका–१० वैरनीमा चुनाव प्रचार प्रसार सम्पर्क कार्यालयको सोमबार उद्घाटन गर्दै सो कुरा बताएका हुन् । गठबन्धनको सरकार भएकाले जनताले विकासको पूर्वाधार निर्माणको लागि गठबन्धनकै उम्मेदवारलाई जिताउँदा सहज हुने भएकोले जीत सुनिश्चित रहेको उनको भनाई थियो । ‘यसपटक गोविन्द भट्टराई जिताएर मन्त्री बनाउनु पर्छ त्यसको साथ दिन म तयार छु भण्डारीले भने, सरकार भए नै काम गर्न सकिन्छ ।’
राजनीतिक स्थायित्वबिना देश विकास हुन नसक्ने कुराको हेक्का राख्दै गठबन्धन गरिएको भण्डारीले बताए । उत्तेजना तथा भावावेशमा आएर राजनीतिले सही निकास दिन नसक्ने भण्डारीले बताए । नेपाली काँग्रेसका उम्मेदवार भट्टराईको राजनीतिमा धेरै लामो योगदान, त्याग भएको तर अवसर नपाएको नेता भएकोले उपनिर्वाचनमा विजय गराएर न्याय गर्नु पर्ने भण्डारीको भनाई थियो ।
