दमौली, बैशाख १६

भानु नगरपालिका शिक्षा युवा तथा खेलकुद शाखाको आयोजनामा विद्यालय व्यवस्थापन समितिका अध्यक्ष तथा शिक्षक अभिभावक संघका अध्यक्षहरूको लागि दुई दिने क्षमता विकास तालिम शनिबार सम्पन्न भयो । भानु नपा–२ नारेश्वरटार स्थित होमराज लोहनी शारदा शिक्षा सदन माविमा आयोजित सो कार्यक्रम मुख्यगरी सामुदायिक विद्यालय सुधारका लागि विव्यवस र शिअसंघ लगायत शैक्षिक सरोकारवालाहरूको सहभागिता र अपनत्व बढाउने उद्देश्यले आयोजना गरिएको थियो ।

सो कार्यक्रममा विव्यस र शिअसंघको काम, कर्तव्य र अधिकारको बोध गराउँदै विद्यालय स्तरीय विभिन्न योजना निर्माण र कार्यान्वयनमा अभिभावकहरूको सहभागिता बढाई उनीहरूलाई विद्यालय प्रति थप जिम्मेवार र उत्तरदायी बनाउने रणनीतिको बारेमा छलफल गरिएको थियो । साथै विद्यार्थी भर्ना कार्यक्रमलाई थप प्रभावकारी बनाउन, विद्यालय सुधार योजना लगायत सामाजिक परीक्षण र सुशासन कायम गर्नका लागि समेत यस कार्यक्रमले सकारात्मक प्रभाव पार्ने अपेक्षा लिइएको छ ।

सो कार्यक्रममा भानु नगरपालिकाका प्रमुख आनन्दराज त्रिपाठीले आगामी दिनमा अभिभावकहरूबाट उठाइएका शैक्षिक सबालहरूलाई स्थानीय सरकारको नीति, योजना, कार्यक्रम र बजेटबाट सम्बोधन गरिने प्रतिवद्धता समेत व्यक्त गरे । तालिम समापन सत्रमा भानु नगरपालिकाका नगर उप–प्रमुख उमा गोतामेले नगरको आन्तरिक स्रोतले भ्याएसम्म शिक्षा, स्वास्थ्य र कृषि क्षेत्रलाई उच्च प्राथमिकतामा राखेर सम्बोधन गरिने कुरा बताईन् ।

सो तालिमको समापन सत्रमा अभिभावकहरूसँग व्यापक रूपमा शैक्षिक अन्तरक्रिया समेत गरिएको थयो । यस क्रममा विद्यालय सुधारका लागि स्थानीय सरकारले चाल्नुपर्ने विविध कदमहरू र अख्तियार गर्नुपर्ने नीति र योजनाका बारे सुझाव दिइएको थियोे भने विभिन्न मागहरू समेत राखिएको थियो । कार्यक्रममा अध्यक्ष तथा अभिभावकहरूबाट उठाइएका विभिन्न जिज्ञासाहरूको नगर प्रमुख त्रिपाठी र नगर शिक्षा अधिकारी ध्रुवराज पौडेल र शिक्षा अधिकृत सरस्वती गुरूङ ढकालले जवाफ दिएका थिए ।

यसअघि उक्त कार्यक्रममा चैत्र २९ र ३० गते चोक मावि केन्द्रमा र बैशाख ३ र ४ गते चन्द्रावती मावि चुँदीमा सम्पन्न भैसकेको छ ।