आवुँखैरेनी, बैशाख २०
बन्दिपुर गाउँपालिका–५ आँधिखोला स्थित पृथ्वीराजमार्गमा बुधबार बिहान ट्रक पल्टिएर घरमा ठोकिँदा ८ जना घाईते भएका छन् । डुम्रे तर्फबाट मुग्लिन तर्फ जादै गरेको ना ४ ख १९७३ नम्बरको ट्रक अनियन्त्रित भई सडकको छेउमा रहेको सुनमायाकान भुजेल र सन बहादुर भुजेलको घरमा ठोक्किएको थियो । सो दुर्घटनामा परी सोही घरका तथा बस्ने पैदल यात्रीहरु गरी ८ जना घाईते भएका छन् ।
घाईतेहुनेहरुमा सोही ठाउँका ५५ बर्षिय सनबहादुर भुजेल, सोही ठाउँका ५० बर्षिय चेतबहादुर घर्ती, १२ बर्षिय आयुस भुजेल, १० बर्षिया जस्मिन भुजेल, १० बर्षिय ईश्वर भुजेल, ८ बर्षिय समिर भुजेल, ६ बर्षिया आयुसा भुजेल र ५ बर्षिया सन्तोष भुजेल रहेका छन् । बालबालिकाहरु विद्यालय जाने तयारी गरिरहेको समयमा सो दुर्घटना भएको थियो ।
घाईतेहरुको तत्काल उद्दार गरी उपचारको लागी हार्डजोर्नी अस्पताल आबुँखैरेनीमा प्राथमिक उपचार पश्चात थप उपचारको लागी चितवन स्थित पुरानो मेडिकल कलेज भरतपुर पठाईएको जिल्ला प्रहरी कार्यालय तनहुँले जनाएको छ ।
उक्त घटनाको बिषयलाई लिएर अहिले पृथ्वी राजमार्ग अबरुद्ध बनेको छ । अवरुद्ध सडक खुलाउनको लागी आवश्यक पहल भईरहेको र ट्रक चालकलाई नियन्त्रणमा लिई घटनाको सम्बन्धमा थप अनुसन्धान भईरहेको डिएसपी मोहनबहादुर खाँणले बताए । तश्विरहरुः डिपी अधिकारी
