काठमाडौं, बैशाख २८
नेकपा एमालेका अध्यक्ष केपी शर्मा ओलीले बैशाख १० गते सम्पन्न उपनिर्वाचनमा तनहुँ र चितवनमा पार्टीको मत घट्नु चिन्ताजनक भएको जनाएका छन् । विहिबारबाट काठमाडौंमा सुरु भएको नेकपा एमालेको केन्द्रिय कमिटिको बैठकमा अध्यक्ष ओलीले प्रस्तुत गरेको राजनीतिक प्रतिबेदनमा उपनिर्वाचन २०८० को शिर्षकमा समिक्षा प्रतिबेदन प्रस्तुत गर्दै अध्यक्ष ओलीले तनहुँ १ र चितवन २ मा पार्टीको मतमा उल्लेख्य कमी आउनु चिन्ताको विषय भएको उल्लेख गरेका छन् ।
नेकपा एमालेले उपनिर्वाचनमा संख्यात्मक क्षती ब्यहोर्नु नपरेपनि पार्टीको मतमा कमी आउनु चिन्ताजनक भएको ओलीले जनाएका छन् । गत मंसिरमा सम्पन्न आमनिर्वाचनको तुलनामा उपनिर्वाचनमा पार्टीको मत घट्नु र वर्तमान सत्ताको विकल्प नेकपा एमाले हो भन्ने निर्विवाद तथ्यमा समेत परिणाम आउनु गम्भिर विषय भएको अध्यक्ष ओलीले जनाएका छन् ।
सम्बन्धित प्रदेश र जिल्ला कमिटिले उपनिर्वाचनको परिणामको गम्भिर समिक्षा गर्नु पर्ने र रहन गएका कमीहरुलाई अबिलम्ब सच्याउनु पर्ने अध्यक्ष ओलीको प्रतिबेदनमा उल्लेख छ ।
