देवघाट, जेठ १७
देवघाट गाउँपालिकामा मृत्यु भईसकेको व्यक्तिको नाममा पनि सामाजिक सुरक्षा भत्ता निकासा गरिएको खुलेको छ ।
महालेखा परिक्षकको आर्थिक वर्ष ०७८÷०७९ को वार्षिक प्रतिबेदनमा जनाईए अनुसार देवघाटमा मृत्यु भईसकेका चार जना व्यक्तिको नाममा पनि सामाजिक सुरक्षा भत्ता वितरण भएको छ ।
जस अनुसार वडा नम्बर ५ का बिहारीलाल सापकोटा र तुलसी सुवेदी तथा वडा नम्बर ३ का धनमाया पौडेल क्षेत्री र अम्बरबहादुर थापाको मृत्यु भईसकेपनि उनीहरुको नाममा सामाजिक सुरक्षा भत्ता वितरण गरिएको छ ।
सापकोटा, सुवेदी र क्षेत्रीको नाममा दोश्रो चौमासिक र थापाको नाममा तेश्रो चौमासिकमा भत्ता वितरण भएको प्रतिबेदनमा उल्लेख छ । थापाको नाममा १० हजार ३ सय, सुवेदीको नाममा ३ हजार, क्षेत्रीको नाममा ७ हजार २ सय र थापाको नाममा ११ हजार ६ सय रुपैयाँ बढि भुक्तानी भएको प्रतिबेदनमा उल्लेख छ ।
सामाजिक सुरक्षा कार्यक्रम कार्यविधि, २०७५ को दफा १२ मा लाभग्राहीको मृत्यु भएमा मृत्यु दर्ताको सुचना फारम बमोजिम स्थानीय तहको मुल अभिलेखबाट लगत कट्टा गर्नु पर्ने व्यवस्था रहेको छ । पालिकाको केही वडाहरुमा नमुना परिक्षण गरि हेर्दा मृत्यु दर्ता भईसकेको व्यक्तिको नाममा समेत भत्ता वितरण हुन गएको देखिएको प्रतिबेदनमा उल्लेख छ ।
प्रतिबेदनले यसमा सम्बन्धित वडा सचिवहरुलाई जिम्मेबार ठानी उनीहरुबाट नै उक्त रकम असुल उपर गर्नु पर्ने जनाएको छ ।
