दमौली, जेठ २९
राष्ट्रिय स्वतन्त्र पार्टीले तनहुँमा आक्रामकरुपमा संगठन निर्माण गरिरहेको छ । सो पार्टीले तनहुँकै २ वटा निर्वाचन क्षेत्रमा कार्यकर्ता भेला गरिसकेको । साथै स्थानीय तह स्तरीय भेला र वडा स्तरीय भेला पनि भईरहेको सो पार्टीले जनाएको छ ।
अनलाईन मार्फत सदस्यता आवदेन दिएका पार्टी सदस्यहरुको भेलाले संगठन निर्माणमा छलफल गरेको सो पार्टीका जिल्ला संयोजक विकास सिग्देलले बताए । राष्ट्रिय स्वतन्त्र पार्टीले कमिटि निर्माणकोलागि पनि अनलाईन मार्फत नै उम्मेदबारी आवदेन लिने व्यवस्था गरेको सिग्देलले बताए ।
हालसम्म आवुँखैरेनी, देवघाट र भानुमा पालिका स्तरीय कमिटि गठन भईसकेको र अन्य पालिकामा भेला भईरहेको र चाँडै नै कमिटि गठन गर्ने प्रक्रिया हुने सो पार्टीले जनाएको छ । सो पार्टीले सोमबार दुलेगौंडाको शिव मन्दिरमा क्षेत्र नम्बर २ भेला आयोजना गरेको छ ।
सो पार्टीले आगामी असार १७ गते भित्र गठन भएका वडा समितिहरुलाई असार ३० गते भित्र निर्वाचन क्षेत्र समिति मार्फत केन्द्रमा अभिलेखिकरण गर्ने जनाएको छ । साथै गठन हुन बाँकी वडाहरुमा साउन १ देखि ३२ गते भित्र उम्मेदवारी दर्ता गर्ने जनाएको छ । वडा स्तरमा सभापति, उपसभापति, सचिव र सदस्यहरु ८ जना गरी ११ जना रहने छन् ।
