काठमाडौं, साउन २६
नेकपा एमालेकी राष्ट्रियसभा सदस्य भगवती न्यौपानेले सदन अवरुद्ध गर्न सरकारले बाध्य बनाएको बताएकी छिन् । राष्ट्रियसभा बैठकमा उच्चस्तरीय समिति बनाउन पटक–पटक भन्दा पनि सरकारले वास्ता नगरेकाले बाध्य भएर सदनमा अवरोध गरेको बताइन् ।
‘हामीलाई सदन अवरुद्ध गर्न बाध्य बनाइएको छ । यो रमाइलोका लागि र रहरका लागि गरिरहेका छैनौँ । नेपाललाई तस्करीको अखडाबाट मुक्त पार्नुपर्छ । अखडा बनाउनु हुँदैन भनेर पटक–पटक भन्यौँ,’ उनले भनिन् ।
मन्त्रीहरूको समेत संलग्नता रहेको आशंकाले सुन तस्करी प्रकरणको छानबिन गर्न उच्चस्तरीय समिति बनाउन माग गरिएको उनले बताइन् । ‘सरकार आफैँ संलग्न भन्ने आशंका छ । तथ्यहरूले मन्त्रीहरू संलग्न छन् भन्ने पुष्टि भइसकेको छ । राज्यको मिलेमतो रहेको पुष्टि हुने आधार धेरै छ,’ उनले भनिन् ।
