देवघाट, भदौ ६
देवघाट गाउँपालिका–५ देवघाटधाममा निर्माणाधिन देवघाट सार्वजनिक पुस्तकालयलाई पुस्तकालयका संरक्षक तथा गलेश्वर आश्रम देवघाटधामका पीठाधीश अनन्तश्री विभूषित महामण्डलेश्वर स्वामी आत्मानन्द गिरिज्युबाट सय बोरा सिमेन्ट प्रदान गरिएको छ ।
आत्मानन्द गिरिज्युबाट बुधबार पुस्तकालयलाई उक्त सहयोग प्राप्त भएको पुस्तकालयका अध्यक्ष शिवराज पौडेलले बताए ।
पुस्तकालयका संरक्षक, महामण्डलेश्वर स्वामी आत्मानन्द गिरिज्यूले आश्रमका तहबाट निर्माणाधीन पुस्तकालयका लागि उपलब्ध गराउनु भएको सहयोगले आफुहरुलाई हौसला मिलेको अध्यक्ष पौडेलले बताए । ‘समुदायका तहबाट निर्माण भइरहेको यस योजनामा आश्रमका तर्फबाट भएको यस सहयोगका निम्ति पुस्तकालय व्यवस्थापन समिति श्रद्धेय स्वामीजी र आश्रम परिवारमा हार्दिक आभार एवं धन्यवाद ज्ञापन गर्दछ ।’ अध्यक्ष पौडेलले भने ।
निर्माणाधिन पुस्तकालयाई देवघाटका विभिन्न व्यक्ति तथा संघ संस्थाले सहयोग गर्ने क्रम बढेको छ । अध्यक्ष पौडेलले पुस्तकालय भवन निर्माणकोलागि हालसम्म सहयोग गर्ने सबैलाई धन्यवाद दिई अन्य व्यक्ति तथा संघ सस्थालाई पनि भवन निर्माणमा सघाउन अपिल गरिएको बताए ।
उक्त भवनको विस्तृत परियोजना प्रतिवेदन अनुसार कूल लागत ३ करोड ६८ लाख रुपैयाँ रहेको अध्यक्ष पौडेलले जानकारी दिए । पौडेलका अनुसार १० हजार भन्दा बढी आर्थिक सहयोग गर्ने दाताहरुको नाम शिलालेखमा उल्लेख गरिने छ ।
