देबघाट, भदौ ११
देवघाट गाउपालीका- ४, गाईघाटमा गत भदौ १ गते राती अविरल वर्षाका कारण खोलामा आएको बाढीले शेयर सदस्यहरुको खेतबारीको अन्नमा क्षती पुगेकोमा देवघाट गाउँपालिका-५ स्थित चक्रवर्ती सामाजिक उद्यमी महिला सहकारी संस्था लि. ले राहत उपलब्ध गराएको छ ।
बाढीले सहकारीका शेयर सदस्यहरु सुकमाया भुजेल, गौरीमाया भुजेल र सविना भुजेलको ५ रोपनीको बारीमा लगाएको धान मकै बालीमा क्षती भएको थियो । उक्त क्षतिपछि सहकारीले विपद व्यवस्थापन कोषबाट उनीहरुलाई जनही २ हजार रुपैयाँ राहतस्वरूप उपलब्ध गराएको सहकारीकी व्यवस्थापक संगिता ओझाले जानकारी दिईन् । सहकारीको ऋण उपसमीती सदस्य दिलमाया सापकोटा, सल्लाहकार समीती सदस्य मिठिदेवी पौडेल सहितको टोलीले उक्त राहत उपलब्ध गराएका थिए ।
उक्त बाढीबाट सहकारीको शेयर सदस्य तथा गाईघाट महीला समूहकी सदस्य धन माया भुजेलको घर पूर्ण रुपमा क्षती भएकोमा सहकारीले यसअघि नै ५ हजार रुपैयाँ राहतस्वरूप उपलब्ध गराईसकेको व्यवस्थापक ओझाले बताईन् ।
सहकारीको उक्त विपद व्यवस्थापन कोषमा आफ्नो जन्म दिन तथा विवाह उत्सव जस्ता अवसरमा सहयोग गरि कोषमा सहयोग गर्ने सम्पूर्ण शेयर सदस्यलाई सहकारीको तर्फबाट आभार व्यक्त गरिएको छ ।
