दमौली, मंसिर ५
नेपाली काँग्रेस तनहुँले महासमिति सदस्य र महाधिवेशन प्रतिनिधिको निर्वाचन सम्बन्धी बाँकी सम्पुर्ण प्रक्रिया स्थगित गरेको छ । काँग्रेस तनहुँका सभापती जितप्रकाश आलेले बुधबार सुचना प्रकाशित गरि निर्वाचन सम्बन्धी सम्पुर्ण प्रक्रिया स्थगित भएको जानकारी दिएका हुन् ।
काँग्रेसको रिक्त महासमिति सदस्य र महाधिवेशन प्रतिनिधिकोलागि गत मंसिर ३ गते मनोनयन दर्ता भएको थियो । निर्वाचन प्रक्रियाकोलागि काँग्रेस तनहुँको बैठकले अधिवक्ता फणिन्द्र कोईरालालाई मुख्य निर्वाचन अधिकृत तोकेकोमा कोईरालाले प्राविधिक कारण देखाउँदै निर्वाचन सम्पन्न गराउन आउन नसक्ने जानकारी गराएका थिए ।
मुख्य निर्वाचन अधिकृतले निर्वाचन गराउन नसक्ने जानकारी गराएको र केन्द्रको निर्देशन अनुसार अर्काे मुख्य निर्वाचन अधिकृत नियुक्ती गरि निर्वाचन तालिका प्रकाशित गर्नु पर्ने र उम्मेदबारहरु विच सहमती पनि जुटाउनु पर्ने भएको हुँदा अर्काे सुचना प्रकाशित नभएसम्म हाललाई निर्वाचन सम्बन्धी सम्पुर्ण प्रक्रिया स्थगित गरिएको सुचनामा जनाईएको छ ।
