पोखरा, मंसिर २१
नेकपा (एमाले)को मध्यपहाडी पुष्पलाल लोकमार्ग केन्द्रित ‘झुलाघाट–चिवाभञ्ज्याङ समृद्धिका लागि संकल्प यात्रा’को टोली आज पर्वत हुँदै कास्की आइपुग्ने भएको छ । यही मङ्सिर १४ गते बैतडीको झुलाघाटबाट शुरू भएको उक्त संकल्प यात्राअन्तर्गत कास्कीमा दुई दिनसम्म विविध कार्यक्रम तय गरिएको गण्डकी एमालेले जनाएको छ ।
एमाले जिल्ला किमिटी कास्कीका अध्यक्ष मनबहादुर गुरुङका अनुसार पार्टी अध्यक्ष केपी शर्मा ओलीसहितको संकल्प यात्राको टोलीलाई आज दिउँसो कास्की र पर्वतको सीमास्थल नयाँपुलमा स्वागत गरिने भएको छ । सोही दिन कास्कीको अन्नपूर्ण गाउँपालिकाको नागडाँडामा स्वागत, पोखरा महानगरपालिकाको हेम्जामा स्वागत तथा भेटघाट कार्यक्रम राखिएको अध्यक्ष गुरुङले जानकारी दिए ।
दिउँसो साढे ३ बजे अन्नपूर्ण गाउँपालिका नौडाँडामा समेत टोलीलाई स्वागत र भेटघाट गर्ने कार्यक्रम रहेको छ । त्यसपछि अध्यक्ष ओलीले साढे ४ बजे हेम्जाको मिलनचोकमा हुने कार्यक्रमलाई छोटो सम्बोधन समेत गर्नेछन् ।
बिहीबार पोखरामा बस्ने ओलीले यहाँ रहदाँ विभिन्न क्षेत्रका व्यक्तिसँग भेटघाट र छलफल गर्ने कार्यक्रम समेत बनेको बताइएको छ । सो क्रममा कास्कीका विविध पक्ष सहित मध्यपहाडी लोकमार्ग अन्तरगत यहाँ देखिएको विवादको बारेमा समेत बुझ्ने बताइएको छ ।
मंसिर २२ गते शुक्रबार बिहान साढे सात बजे जिरोकिमीबाट ओली सहितको संकल्पयात्राको टोली अगाडि बढ्नेछ । सो टोलाीलाई पोखराको अम्मरसिंहचोकमा स्वागत र भेटघाट गरिनेछ भने बिहान ९ बजे तालचोक पुगेर पुनः ओलीले छोटो सम्बोधन गर्नेछन् । रुपा गाउँपालिकाले तालबेसीमा स्वागत गरेपश्चात टोलीलाई रुपाको पिपलेबजारबाट विदाई गरिनेछ। त्यसपछि टोली लमजुङ तर्फ लाग्नेछ ।
संकल्प यात्रामा सहभागी टोलीलाई एमाले स्थायी कमिटी सदस्य एवं कास्की जल्ला इञ्चार्ज थममाया थापासहित नेता, कार्यकर्ताले कास्कीमा स्वागत गर्ने एमालेले जनाएको छ ।
आज बिहान गलकोटबाट हिँडेर ससदरमुकाम बागलुङ बजारमा खाना खाने र पर्वतको कुश्मा सभा र स्थानीय नेता–कार्यकर्ता तथा शुभेच्छुकहरूसँग अध्यक्ष केपी शर्मा ओलीले अन्तरक्रिया गर्ने कार्यक्रम रहेको छ । आजको यात्रामा टोलीले १२० किलोमिटर दूरी पार गर्नुपर्नेछ ।
एमालेले सुदूरपश्चिमको झुलाघाटबाट सुदूरपूर्वको चिवाभञ्ज्याङसम्मको यात्रा शुरू गरेको हो ।
