देवघाट, पुस २०
पवित्र धार्मिक तीर्थस्थल देवघाटधाममा सम्बन्धित निकायको अनुमती बिना मोटरबोट सञ्चालनमा ल्याइएको छ । बोटे बोरा मोटरबोट प्रालिले सम्बन्धित निकायसँग अनुमती नै नलिईकन दुई सातादेखि देवघाटको वेणी संगम क्षेत्रमा मोटरबोट सञ्चालनमा ल्याएको हो ।
पवित्र कालिगवन्डकी र त्रिशुलीको संगम वेणीको पाँच सय मिटर वरपर मोटरबोट सन्चालन गर्न पाईदैन । उक्त नियमको उल्लंघन गर्दै देवघाट क्षेत्र विकास समितिसँग पनि कुनै अनुमती नलिईकन र आवश्यक प्रक्रिया पुरा नगरिकन मोटरबोट सन्चालन गरिएको पाईएको हो ।
देवघाट क्षेत्र विकास समितिका कार्यकारी निर्देशक सदन बरालले क्षेत्र विकास समितिसँग अनुमती नै नलिईकन मोटरबोट सन्चालन गरेको पाईएपछि रोक्न निर्देशन दिईएको बताए । मोटरबोट सन्चालनकोलागि कुनै पनि प्रक्रिया पुरा नगरिकन सन्चालन गर्न अबैध भएको बरालको भनाई छ । बेणी संगमको पाँच सय मिटर वरपर मोटरबोट सन्चालन गर्न नपाईने नियम रहेको बरालले जानकारी दिए ।
उक्त कम्पनीले सम्बन्धित निकायसँग अनुमती नलिईकन देवघाट क्षेत्रमा छोटो र लामो दूरीमा मोटरबोट चलाएको छ । छोटो दूरीमा देवघाटधामको वेणिसङ्गमबाट नागकुण्ड, सूर्यकुण्ड, झोलुङ्गे पुल हुँदै तपोवनसम्म मोटरबोटको यात्रा गर्न सकिने छ । छोटो दूरीको शुल्क रु दुई सय ५० तोकिएको छ ।
लामो दूरीमा झण्डै आठ किलोमिटरको यात्रा गराइने छ । वेणिसङ्गमबाट गैँडाकोटको नरसिंह दिव्यधामसम्म लामो दूरीको यात्रा गराइने कम्पनीले जनाएको छ । लामो दूरीको भने हालसम्म शुल्क निर्धारण गरिएको छैन । भरतपुर महानगरपालिकाबाट स्वीकृति लिएर मोटरबोट सञ्चालन गरिएको कम्पनीले जनाएको छ ।
देवघाटमा चितवनबाट तनहुँतर्फ आवतजावतका लागि डुङ्गा नियमित सञ्चालनमा छन् । तर उक्त डुङ्गाहरुमा यात्रुहरुको कुनै बिमा गरिएको छैन । हालसम्म डुङ्गाको बिमा नगरिएको र अब चाँडै नै सबै डुङ्गालाई बिमाको प्रक्रियामा लगिने देवघाट क्षेत्र विकास समितिका कार्यकारी निर्देशक बरालले बताए ।
