दमौली, जेठ १५
सरकारले तनहुँको भानु नगरपालिकाको चुँदी रम्घामा भानु साहित्य उद्यान स्थापना गर्ने जनाएको छ । मंगलबार सरकारको आगामी आर्थिक वर्षको बजेट प्रस्तुत गर्दै अर्थमन्त्री बर्षामान पुनले संस्कृति संरक्षण र सम्बद्र्धन कार्यक्रम अन्तर्गत तनहुँको चुँदी रम्घामा सबै नेपाली भाषाभाषीका मुर्धन्य श्रष्टाको प्रतिमा र सप्तधाम सहितको भानु साहित्य उद्यान स्थापना गर्ने घोषणा गरेका हुन् ।
नेपाली साहित्यका आदिकवि भानुभक्त आचार्यको जन्मस्थल भानु नपा–४ को चुँदी रम्घामा भानु साहित्य उद्यान निर्माणको लागि स्थानीय तहले कार्य सुरु गरेको र जग्गा प्राप्तीको प्रक्रिया समेत सुरु भईसकेको अवस्थामा संघीय सरकारले नै आगामी आर्थिक वर्षमा उक्त भानु साहित्य उद्यान निर्माणको घोषणा गरेको हो । सरकारको यो घोषणा पछि अव चुँदी रम्घामा भानु साहित्य उद्यान बन्ने निश्चित भएको छ ।
यसैगरि स्वास्थ्य तर्फ सरकारले आगामी आर्थिक वर्षमा शुक्लागन्डकी नगरपालिकाको बेलचौतारमा रहेको जिपी कोईराला राष्ट्रिय श्वास प्रश्वास उपचार केन्द्रको पुर्वाधार विकास तथा उपकरणका लागि आवश्यक बजेटको विनियोजन गर्ने भएको छ ।
त्यस्तै प्रशारण लाईन तर्फ हेटौंडा–रातमाटे–लप्सिफेदी–दमौली–न्यु बुटवल ४ सय केभी प्रशारण लाईन निर्माण कार्य शुरु गर्ने तथा सडक पुर्वाधार तर्फ भरतपुर, बुटवल र पोखरा जोड्ने त्रिभुज परियोजना अन्तर्गत मुग्लिन–पोखरा सडक खन्डलाई कृषि तथा खाद्य प्रशोधन उद्योगको केन्द्रको रुपमा विकास गरिने उल्लेख गरिएको छ ।
त्यस्तै गरि पृथ्वी राजमार्गको आबुँखैरेनी–पोखरा खन्डमा आगामी आर्थिक वर्षमा कालोपत्रे सम्पन्न गरिने छ भने मुग्लिन–आबुँखैरेनी सडक विस्तारको निर्माण कार्य पनि आगामी आर्थिक वर्षबाट सुरु गरिने भएको । उक्त सडक विस्तारको लागि ९ अर्व ५७ करोड विनियोजन पनि गरिएको छ ।
