दमौली, असार ९
सुर्य नेपाल प्रा.लि.ले दमौली अस्पतालको लागि दुईवटा हेमोडायलाइसिस मेसिन उपलब्ध गराएको छ ।
कम्पनीको संस्थागत सामाजिक उत्तरदायित्व अन्तर्गत निजी क्षेत्रको कम्पनी सूर्य नेपालले दमौली अस्पताललाई रु २८ लाख बराबरका दुई थान हेमोडायलाइसिस मेसिन प्रदान गरेको हो ।
कम्पनीका जनसम्पर्क प्रमुख अन्जन दवाडीले दमौली अस्पतालका प्रमुख डा परिवर्तन बराललाई शनिबार ती मेसिन हस्तान्तरण गरे । अस्पतालमा हाल दश वटा डायलाइसिस मेसिन छन् ।
अस्पतालले दैनिक आठ वटा मेसिन सञ्चालन गरेर ५६ जना मिर्गौलाका बिरामीलाई डायलाइसिस सेवा प्रवाह गरिरहेको डा बरालले जानकारी दिए । एउटा मेसिनबाट दैनिक तीन जना बिरामीको सेवा भइरहेको छ ।
सो अवसरमा तनहुँ क्षेत्र नम्बर १ का सांसद स्वर्णिम वाग्ले, जिल्ला समन्वय समितिका प्रमुख एवं दमौली अस्पताल व्यवस्थापन समितिका प्रमुख शान्ति रमण वाग्ले, प्रमुख जिल्ला अधिकार जनार्दन गौतम, प्रहरी उपरीक्षक अपिलराज बोहोरा लगायतको सहभागीता रहेको थियो ।
