देवघाट, असार १४
देवघाट गाउँपालिका-१ स्थित पार्वती माविका विपन्न तथा जेहेन्दार विद्यार्थीहरुलाई स्टेसनरी सामाग्री वितरण गरिएको छ । तनहुँ सेवा समाज दोहा कतारले शुक्रबार विद्यालयमा कार्यक्रमको आयोजना गरि स्टेसनरी सामाग्री वितरण गरेको हो ।
कार्यक्रममा तनहुँ सेवा समाज दोहा कतारका अध्यक्ष पदम गिरीले विद्यालयका ९० जना भन्दा बढि विद्यार्थीहरुलाई स्टेसनरी सामाग्री वितरण गरेका थिए । प्रत्येक विद्यार्थीलाई एक दर्जन कापी र १० वटा कलम उपलब्ध गराईएको थियो ।
विद्यालय व्यवस्थापन समितिका अध्यक्ष तिलप्रसाद गुरुङको अध्यक्षतामा आयोजित सो कार्यक्रममा प्रमुख अतिथि तनहुँ सेवा समाज कतारका अध्यक्ष गिरी, देवघाट गाउँपालिका वडा नम्बर १ का अध्यक्ष मनिराज गुरुङ, विद्यालयका प्रअ राजु गिरी, समाजका सदस्य आकाश गिरी लगायतले मन्तव्य राखेका थिए ।
विद्यालयका गरिब तथा जेहेन्दार विद्यार्थीलाई स्टेशनरी सामाग्री हस्तान्तरण गरि विद्यार्थीहरूमा हौसला प्रदान गरिदिनु भएकोमा विद्यालयका प्रअ गिरीले तनहुँ सेवा समाज, दोहा कतार परिवारलाई धन्यवाद ज्ञापन गरेका थिए ।
