देवघाट, भदौ ६
डेंगु नियन्त्रण र रोकथामका लागि देवघाट गाउँपालिकामा अभिमुखीकरण कार्यक्रम आयोजना गरिएको छ । गाउँपालिकाको सभाहलमा विहिबार डेंगु रोग नियन्त्रण तथा रोकथामको बारेमा अभिमुखीकरण र अन्तरक्रिया आयोजना गरिएको हो ।
वडा नम्बर ५ का अध्यक्ष पूर्णबहादुर कुँवरको अध्यक्षतामा भएको सो कार्यक्रममा देवघाट गाउँपालिकाका अध्यक्ष तिलबहादुर थापाले देवघाटमा डेंगुको संक्रमण देखिएको हुँदा यस रोगलाई नियन्त्रण र रोकथामको लागि सबै नागरिकहरु सचेत बन्नु पर्ने बताए ।
उक्त कार्यक्रमा गाउँपालिकाका स्वास्थ्य शाखा प्रमुख प्रदिप बुढाथोकीले डेंगु नियन्त्रण र रोकथामको लागि लामखुट्टेको लार्भा खोजी तथा नष्ट गर्ने अभियान सञ्चालन गर्नु पर्ने र यसकोलागि पूर्व तयारी तथा सरोकारवालाहरूलाई अभिमुखीकरण गर्नु पर्ने बताए ।
उक्त कार्यक्रममा प्रमुख प्रशासकीय अधिकृत गौरी प्रसाद आचार्य, वडा सदस्यहरु, स्वास्थ्य शाखाका कर्मचारीहरु तथा अन्य विभिन्न शाखाका कर्मचारी तथा विद्यालयका शिक्षकहरुको सहभागिता रहेको थियो । पछिल्लो तथ्यांक अनुसार देवघाट गाउँपालिकाका ३ जनामा डेंगु संक्रमण पुष्टि भएको छ ।
