देवघाट, भदौ १४
तनहुँको देवघाट गाँउपालिका वडा नम्बर ५ ले बोटे, दलित, चेपाङ र ब्रामु समुदायका नागरिकको निःशुल्क स्वास्थ्य बिमा गरिदिने भएको छ ।
देवघाट गाँउपालिकाका ५ वटै वडामा बसोबास गर्ने सिमान्तकृत बोटे र चेपाङ सहित दलित र र ब्रामु समुदायका बासिन्दाहरुको निशुल्क स्वास्थ्य बिमा गरिने देवघाट गाँउपालिका अध्यक्ष तिल बहादुर थापाले जानकारी दिए । यसको लागि गाउँपालिकाले चालु आर्थिक वर्ष २०८१÷०८२ मा ११ लाख लाख रुपैया विनियोजन गरेको छ । यसका साथै अति विपन्न ब्राह्मण क्षेत्रीका नागरिकको पनि गाउँपालिकाले स्वास्थ्य विमा गर्ने अध्यक्ष थापाले बताए ।
आर्थिक अभावमा पछाडि पारिएका समुदायहरु न्यूनतम स्वास्थ्य सेवाबाट वञ्चित हुन नपरोस भनेर यसै आर्थिक वर्षदेखी ति जातिहरुको स्वास्थ्य सेवाको अधिकारलाई सुनिश्चित गरिएको अध्यक्ष थापाले बताए । गाउँपालिकाले सीमान्तकृत र लोपोन्मुख समुदायका सदस्यहरुको स्वास्थ्य, शिक्षा लगायत अन्य विभिन्न क्षेत्रमा पनि सहयोग गर्ने अध्यक्ष थापाले जानकारी दिए ।
