दमौली, पुस १५
सामाजिक विकास कार्यालय तनहुँ आफ्नै भवनमा सरेको छ । व्यास नपा–३ स्थित जिल्ला निर्वाचन कार्यालयको आडैमा निर्माण गरिएको साविकको महिला विकास कार्यालयको भवनमा सामाजिक विकास कार्यालय सरेको छ ।
उक्त कार्यालयको आइतबार गन्डकी प्रदेश सरकारका सामाजिक विकास, युवा तथा खेलकुँद मन्त्री बिन्दुकुमार थापाले उद्घाटन गरे । सो अवसरमा बोल्दै मन्त्री थापाले आफ्नै कार्यालयबाट जनतालाई दिइने सेवा छिटो र सहज हुनुपर्ने बताए ।
सामाजिक विकास मन्त्रालयका सचिव राजेन्द्रदेव पाण्डेको अध्यक्षतामा आयोजित कार्यक्रममा गन्डकी प्रदेशका सांसदद्वय जितप्रकाश आले र अशोककुमार श्रेष्ठ, जिल्ला समन्वय समिति तनहुँका प्रमुख शान्तिरमण वाग्ले, व्यास नगरपालिकाका प्रमुख बैकुण्ठ न्यौपाने, प्रमुख जिल्ला अधिकारी श्यामकृष्ण थापा लगायतले मन्तव्य राखेका थिए ।
उक्त कार्यक्रममा सामाजिक विकास कार्यालय तनहुँका प्रमुख बिदुरहरी आचार्यले कार्यालयको नवनिर्मित भवनको बारेमा जानकारी गराएका थिए । उक्त कार्यक्रमको सन्चालन कार्यालयका लेखा अधिकृत कृष्ण न्यौपानेले गरेका थिए ।
लामो समयदेखी अलपत्र रहेको सो भवनको गिता मना जेभीले १ करोड १५ लाखको लागतमा निर्माण गरेको थियो । यस अघि सामाजिक विकास कार्यालय शिक्षा विकास तथा समन्वय इकाईको भवनमा २ वटा कोठाबाट सन्चालित थियो ।
