तनहुँ, फागुन ११
म्याग्दे गाउँपालिकामा पशु तथा भेटेरीनरी अस्पतालको भवन निर्माण हुने भएको छ । प्रतिनिधि सभाका सांसद शंकर भण्डारी सहित गाउँपालिकाका अध्यक्ष श्रीप्रसाद श्रेष्ठ, उपाध्यक्ष बालकृष्ण घिमिरे र प्रमुख प्रशासकीय अधिकृत नारायणप्रसाद अधिकारी सहितको टोलीले आईतवार संघीय सरकारका कृषि तथा पशुपन्छी विकासमन्त्री रामनाथ अधिकारीलाई भेट गरि भेटेरीनरी अस्पतालको भवन निर्माणकोलागि बजेट उपलब्ध गराउन माग गरेका थिए ।
मन्त्रालयमा मन्त्री अधिकारी र सचिव सहितको टोलीसँगको भेटमा उक्त प्रस्तावित भवन निर्माणकोलागि मन्त्रालयले १ करोड ५० लाख रुपैयाँ उपलब्ध गराउने सहमती भएको म्याग्दे गाउँपालिकाका प्रमुख प्रशासकीय अधिकृत नारायणप्रसाद अधिकारीले बताए । उक्त भवन चालु आर्थिक वर्षमै निर्माण सुरु हुने अधिकारीले बताए ।
यसैगरि वडा नम्बर २ मा निर्माण गरिएको ल्याण्डफिल साइटमा थ्रि फेज विद्युत लाइन जडान नहुँदा संकलित फोहोरको व्यवस्थान र प्रशोधन गर्न समस्या परेको हुँदा गाउँपालिकाको उक्त टोलीले आइतबार नै नेपाल विद्युत प्राधिकरणका कार्यकारी निर्देशक कुलमान घिसिङलाई भेट गरि थ्रि फेजको विद्युत लाइन जडान गर्न अनुरोध गरेका थिए । सो क्रममा प्राधिकरणले थ्रि फेज लाइन जडानको लागि २३ लाख रुपैयाँ उपलब्ध गराउने सहमती भएको पनि प्रमुख प्रशासकीय अधिकृत नारायणप्रसाद अधिकारीले बताए ।
