तनहुँ । जेठ २६
म्याग्दे गाउँपालिका वडा नम्बर १ को आयोजनामा उक्त वडाका टोल विकास संस्थाका प्रतिनिधिलाई सिप तथा क्षमता विकास सम्बन्धि तालिम दिईएको छ । उक्त तालिमको सोमबार म्याग्दे गाउँपालिकाका अध्यक्ष श्रीप्रसाद श्रेष्ठले उद्घाटन गरे ।
तलिमको उद्घाटन गर्दै गाउँपालिकाका अध्यक्ष श्रेष्ठले महिलाहरुको सिप तथा क्षमता विकासकोलागि यस खाले तालिम उपयुक्त हुने बताए । गाउँपालिकामा विभिन्न किसिमका धेरै तालिम उपलब्ध भएको भन्दै अध्यक्ष श्रेष्ठले तालिमका सिपलाई व्यवहारमा उतार्ने काममा कमी भएको बताए ।
वडा नम्बर १ का अध्यक्ष तथा गाउँपालिकाका प्रवक्ता मणिभद्र वाग्लेको अध्यक्षतामा आयोजित उक्त तालिममा गाउँ कार्यपालिका सदस्य थममाया विक, वडा सदस्य मिनबहादुर थापाले मन्तव्य राखेका थिए । उक्त कार्यक्रमको सन्चालन वडा सचिव केशवराज पौडेलले गरेका थिए ।
चार दिनसम्म चल्ने सो तालिममा महिला अधिकार र शसक्तिरण, लैङ्गिक हिंसा, टोल विकास संस्थाका पदाधिकारीको भूमिका, बैठक व्यवस्थापन, माइनुट लेखन, भाषणकला, उद्घोषणकला लगायतका विषयमा लोकवाणी दैनिकका सम्पादक प्रकाशचन्द्र भट्टराई र तनहुँ खबर दैनिकका कार्यकारी सम्पादक बिनोद ढुङ्गानाले सहजिरण गर्नेछन् । तालिमम वडा नम्बर १ का विभिन्न टोल विकास संस्थाका ४० जनाको सहभागिता रहेको छ ।
