अन्जान परियार । तनहुँ, जेठ २७
घिरिङ गाउँपालिका–१ घ्यान्छाप–पुटार मोटरमार्ग अन्तर्गत घ्यान्छाप देखि बोहोछाप सम्मको करिब ७ सय मिटर सडक खण्डमा कालोपत्रे कार्य सम्पन्न हुँदैछ । डिबिएसटी प्रविधि मार्फत पिच गरिएको यस सडकको निर्माण गण्डकी प्रदेश सरकार र घिरिङ गाउँपालिकाको समपुरक बजेट बाट १ करोड १७ लाख आर्थिक वर्ष ०८१/0८२ मा सुरु गरिएको हो ।
हालसम्म उक्त खण्डको करिब ८२ प्रतिशत काम सम्पन्न भइसकेको छ भने बाँकी काम अन्तिम चरणमा पुगेको घिरिङ गाउँपालिकाका प्राविधिक अमृत कुमार श्रेष्ठले जानकारी दिए । सडक निर्माणको जिम्मा लिएको लिस्सम निर्माण सेवा कम्पनी सँग २०८१ मंसिर २४ गते सम्झौता भएको हो ।
यसैक्रममा, घ्यान्छाप–पुटार सडकको पहिलो खण्ड, अर्थात् स्वामिभञ्ज्याङ देखि घ्यान्छाप सम्मको भाग ७ सय मिटर सडक खण्ड कालोपत्रे गर्ने कार्य अगाडि बढाइएको छ । गाउँपालिकाले सो कार्यका लागि २ करोड रुपैयाँ बजेट विनियोजन गरिसकेको छ भने आर्थिक वर्ष २०८२/८३ मा थप ९१ लाख रुपैयाँ समपुरक संघीय बजेट पनि व्यवस्था गरिएको गाउँपालिका अध्यक्ष होम बहादुर थापाले बताए ।
गाउँपालिका अध्यक्ष थापाले गाउँपालिकाको मुख्य सडक मुद्धाको कारण काम गर्न नसकेकोले शाखा बाटोका योजनालाई प्राथमिकतामा राख्दै आएको बताए । सडक निर्माणपछि यस क्षेत्रका बासिन्दाले सहज र सुरक्षित यातायात सेवा पाउने विश्वास गर्दै बर्खामा हिलो र हिउँदमा धूलोका कारण यातायातमा हुने समस्याको अन्त्य हुने थापाको भनाई छ ।
यसको साथै, मानपुर–डेढगाउँ सडक खण्डको सम्पन्नता पछि स्थानीयलाई राम्रो यातायात सेवा प्राप्त भएको दाबी गर्दै, मदन मोटर मार्ग र पशुपति मोटरमार्ग जस्ता शाखा बाटोहरूको निर्माणका लागि बजेट विनियोजन गरिसकिएको तर ठेकेदारले काम गर्न ढिलाई गरेको कारण केही समस्याहरू आएको पिडा व्यक्त गरे ।
