चितवन । जेठ २९
पृथ्वी राजमार्गअन्तर्गतको मुग्लिन–मलेखु सडकखण्डमा भोलिदेखि रातको समयमा बन्द हुने भएको छ । रातको समयमा सवारी आवागमन रोक्दै सडक स्तरोन्नतिको काम सुरु हुने भएकाले जेठ ३० गते शुक्रबारदेखि असार ७ गतेसम्म रातिमा सडक बन्द हुने भएको हो । प्रत्येक रात १०ः३० बजेदेखि बिहान ३ः०० बजेसम्म सवारी आवागमन बन्द रहनेछ ।
नागढुङ्गा–मुग्लिन सडक आयोजना (पश्चिम खण्ड) का प्रमुख इन्जिनियर केदारप्रसाद नेपालका अनुसार, बार्बाङ खोला, मोवा खोला, खटौती खोला र गोमती खोलामा आरसिसी बिम राख्ने कामका लागि सडक बन्द गर्न लागिएको हो । ‘भारी क्रेन प्रयोग गर्नुपर्ने भएकाले रातको समयमा मात्र काम सम्भव भएको हो,’ उनले जानकारी दिए ।
काम सुरु भएको समयमा, सुरक्षा र कामको सहजताका लागि सवारी साधनहरूलाई विभिन्न स्थानमा रोक्ने व्यवस्था गरिएको छ । मलेखुबाट मुग्लिनतर्फ जाँदै गरेका भारी सवारीसाधनहरू मलेखुमा, हलुका सवारीसाधनहरू शितलबजारमा रोकिनेछन् ।
उता, मुग्लिनबाट मलेखुतर्फ जान चाहने भारी सवारीहरू मुग्लिनमा र हलुका सवारीहरू कुरिनटारमा रोकिनेछन् । रोकिएका सवारीहरू बिहान ३ बजेपछि मात्रै गन्तव्यतर्फ जान पाउनेछन् ।
आयोजनाले यात्रुहरूलाई वैकल्पिक समय र मार्ग अपनाउन आग्रह गरेको छ । अत्यावश्यक सवारीबाहेक अरु सबैलाई तोकिएको समय अवधिभर यात्राबाट परहेज गर्न सुझाव दिइएको छ । स्थानीय बासिन्दा र यात्रुहरूलाई असुविधा भए पनि लामो समयदेखि अलपत्र परेको सडक स्तरोन्नतिको कामले केही सहजता ल्याउने अपेक्षा गरिएको छ ।
